Diabierna awor pa 6or di atardi e federacion di esgrima S.A.B.A. lo tene nan respectivo torneo pa tur nan atletanan. E competencia lo ta den e 3 categoria esta infantil, cadete y senioren. E aña aki e federacion di esgrima tabata hopi activo unda nan a tene 4 competencia durante di e henter e aña. Semper a organisa nan competencianan tradicional celebrando Dia di Betico, Himno y Bandera y Dia di Rey. Den luna di juni, e federacion di esgrima, a organisa e campeonato di Copa Thomas 2018, dedica na e legendario atleta di esgrima Arubano y alabes atleta Olimpico bou di e constelacion Antiyano, Austin Thomas, awe den feliz memoria. Na bida Austin Thomas tabata presidente di e federacion y pa hopi aña e la dedica su bida na siña nos hobennan practica e deporte Olimpico.
Mester bisa cu e atletanan di e tres clubnan di esgrima na Aruba esta Universal Fencing Club, Scherm Club Brazil y Don Bosco Knights sigur lo ta presente unda nan lo duna un berdadero espectaculo den e deporte di arte martial. Tin varios prospecto y talento nobo den e deporte di arte martial aki mientras cada dia e deporte ta crece den atendencia y bira mas popular bou di nos hubentud. E combate nan tur lo bay ta riba bon nivel unda e atletanan lo demostra nan strategia, atake y liheresa durante cada combate.
Lotto, e loteria di Aruba pa medio di Stichting Sportsubsidie Aruba a yuda subsidia e campeonato nacional di esgrima organisa pa Scherm Amateur Bond Aruba
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.