Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua riba veld di Flatstone. Den categoria AA Royal Power Tat Fat Home Depot a hunga su double header contra e fuerte ekipo di Balashi Premuim. Den e prome wega empata 3-3 te den di 4 inning e muchanan di Balashi Premuim ta rally pa bay ariba 7-3 unda finalmente nan ta sali victorioso 10-5. Balashi Premuim 10 careda, 5 hit, 3 eror. Royal Power Tat Fat Home Depot 5 careda, 5 hit, 2 eror. E hoben pitcher den desaroyo Giancarlo Gomez kende ta ricibi relevo di Erick Henriquez den di 4 entrada ta bay cas cu e victoria regalando 6 base por bola den combinacion. Jair Thompson a cuminsa skerpi pa Royal Power pero ta descontrola y ta wordo releva pa Kelvin Silvania den di 4 entrada. Hunto nan ta permiti 6 base por bola lansando 6 strike out. Pa Balashi Premuim a destaca na bate Nathan Berkel 3-2, Sando Geerman 2-1, Egimar Lampe 4-1 y Gerald Werleman 3-1. Pa Royal Power Tat Fat a luci Darwin Escobar, Gregory Krosendijk y Jorge Wouters tur di 2-1, Luis Pelayo di 1-1. Den di dos partido di anochi Jomark Flanegin e MVP di aña 2016 a baha hopi skerpi riba monticulo. Jomark tabata tirando un “perfect game” te den di ultimo entrada unda riba un strike out cu a pasa bay laga e catcher unda e catcher ta reaciona rapido tira primera den un bang bang play e coredor ta yega safe y ta kibra su “No Hit No Run”. Jomark Flanegin ta bay cas cu e victoria propinando e muchanan di Balashi alabes un total di 8 strike out. Royal Power 7 careda, 7 hit, 0 eror. Balashi Premium 0 careda, 0 hit, 3 eror. Miho bateadornan pa Royal Power Tat Fat Home Depot a resulta di ta Kenny Hart di 4-3, Giandrick Lacle 3-2, Darwin Escobar y Luis Pelayo ambos di 3-1. Campeonato ta continua dialuna 12 di Juni 7:15pm na Pos Chikito unda Blackhawks lo enfrenta Celebrities y pa 9pm Predators lo midi forsa contra Logros. Diamars 13 di Juni na veld di Dragon Hitters, Spuiters y Piratas lo topa otro den un double header mientras diaranson 14 di Juni na Dragon Hitters, Pizza Hut Monster lo enfrenta Balashi Premuim den nan double header cuminsando pa 7:15pm. Weganan di softball fast pitch den pleno desaroyo!!!!