Diabierna 7 di October ta inicia oficialmente cu e prome wega di e campeonato di futbol Division Honor 2016-2017 den Stadion Guillermo Prospero Trinidad na Dakota. Pa e wega aki e expectativanan ta halto, manera ta conoci, e wega lo ta entre RCA y SV Dakota, cu ta e revancha di aña pasa.
Presidente di Arubaanse Voetbal Bond (AVB) a expresa. “Tur hende ta ansioso pa e weganan cuminsa”. E aña aki ta dedica e campeonato 16/17 na 4 baluarte den futbol. Lo dedica e campeonato na Frans Dijkhoff, un ex referee y cu a traha hopi aña den directiva di AVB. Tambe lo dedica e campeonato na Beto Peña, un persona di edad cu a hunga futbol pa hopi aña. Banda di esaki ta dedik’e na Theo Ruiz di Bubali, kende tambe tin un trayectorio largo den mundo di futbol y e di 4 persona ta Cadochi Kock, un persona conoci no solamente riba tereno di futbol pero tambe den naracion di weganan. “Ta trata di cuater persona cu mester duna realce awor cu nan t’ey ainda”, asina Richard Dijkhoff a bisa.
Ya caba a cuminsa cu e promocion pa e campeonato aki y benta di carchi ta bayendo bon pa e prome wega entre RCA y na Dakota. Banda di esaki tin tur informacion riba red social. AVB a habri awor su mesun fanpage: Arubaanse Voetbal Bond unda por haya tur tipo di informacion cu ta regarda tur wega di tur division.
E aña aki a opta pa cuminsa tempran y no warda te na ultimo. Ta purba di tur forma pa yega cerca e fanaticada, haci e weganan mas interesante y bin cu incentivonan pa publico prome, durante y despues di e weganan pa por tene e campeonato bibo, e fanaticonan interesa. “Banda cu bo ta mira un bon wega di futbol, lo bo por gana diferente premio disponibel durante e campeonato”, asina e presidente di AVB a termina bisando.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
- Latest
