Campeon di Aruba ta ricibi Campeon di St Maarten den un “Challenge of Champions”

Algun dia atras sv RCA a ricibi e grato noticia for di Arubaanse Voetbal Bond, cu Concordia Footbal Organisation di French St Martin lo ta na Aruba diasabra 17 September pa reta e Campeon di Aruba RCA “Big Wheel Lottery powered by Powerade”. Concordia cu ta e team cu ta domina futbol na St Maarten kier midi forsa cu e Tricolornan cu ta domina futbol na Aruba y Caribe Hulandes. No mucho tempo atras na November ultimo RCA a titula Campeon di e torneo inter-insular na Boneiro y algun aña atras a gana y kibra invicto di Centro Dominguito Campeon di Corsou. Soldatnan di Solito ta hibando un preparacion structura. Manera ta e tradicion na RCA ta duna oportunidad na e sistema hubenil pa reforsa Division di Honor y mester bisa cu esaki a bay hopi bon den e torneo di pre-campeonato Copa Don Elias Mansur. Pa e wega contra Concordia e “Astro” Erik Santos lo ta bek cu ekipo. Directiva kier invita e fanaticada Tricolor cu a yega y yena Centro Deportivo Guillermo Prosperidad Trinidad na final di campeonato, pa un bes mas bin hunto den e dushi ambiente cu Tamboras y DJ Sky pa celebra otro fiesta y victoria di futbol tricolor. Carchi pre-benta ta obtenibel pa solamente Awg 10,00 cerca Abelo na Welcome Back Snack, Hamaka y RCA Arena. Saca bo bandera, jersey of t-shirt y apoya nos Soldatnan di Solito, yega tempran pasobra e bataya lo inicia pa 9:30 pm pero tin un tremendo pre-game entre “Estrella y Britannia” pa 7:30 pm.

Comments

comments