Jurette Croes ta healthpromotor di Departamento di Salud Publico y el a conta cu tabata tin tres siman di campaña di vacunacion contra influenza, cual a bay hopi bon. Pueblo a responde, mas tanto esnan di edad halto ta esunnan cu a acudi na e postnan. Di e 5600 vacuna cu tabata tin den stock, ta bayendo pa e ultimo lotenan, cu ta casi caba.
Croes ta sigui splica cu na e momentonan aki ainda nan ta encurasha e docentenan, lidernan di creche, personanan cu ta haci cuido na hende grandi, ta pidi nan ainda pa nan yega pa nan tuma e vacuna aki pa nan tambe por proteha e grupo di riesgo, esta e personanan cu ta mas vulnerabel den comunidad. Ta pidi nan pa nan yega tambe pa nan haya vacuna pa asina proteha nan.
Desde 1 di December, departamento di malesanan contagioso, tin un ahuste den nan orario. Si bo ta bin cu bo receta di dokter, cual e grupo di riesgo tin cu haya di nan dokter di cas, y nan ta haya e vacuna por nada. Si ta bin cu e receta por bin entre 7’or y 45 pa 11’or y 45 di mainta y di 1’or y 15 di merdia te cu 4’or y si ta bin pa paga 15 florin pa haya e vacuna, e ora ey por bin entre 7’or y 45 pa 11’or y 45 di mainta y di 1’or y 15 pa 3’or y 15. Esey ta e unico ora cu tin caha habri cu por atende cu e placa.
Una bes cu e vacunanan caba, el a caba. No tin posibilidad pa bestel mas pa e aña aki.