E campaña di sterlisacion, Stimami Sterilisami, ta duna su resultado positivo caba pero e ta un proyecto cu ta tuma hopi aña pa duna e fruto total. Esaki ta pasobra cu tin hopi cacho rba caya, caminda cu nan ta bayendo den e direccion ey cu mas 7 mil pushi cu cacho a wordo sterilisa, cual ta un progreso grandi. Sra Tisa La Sorte di Bucuti & Tara Beach Resort ta amplia.
Definitivamente cu e solucion ta pa steriliza tur e bestianan rond di nos isla mas cu ta posibel, aunke e ta bay tuma tempo pa trece resultado pasobra ta keda traha riba prevencion. Meta ta pa no nace mas pushi cu cachonan ariba caya, aunke tin un generacion di cacho y pushi ariba caye. P’esey mester sterilisa nan, y esaki ta keda un problematica unda ainda tin hopi riba caya.
E aña aki ta e di 3 edicion di e programa di Stimami Sterilisami y ta bin mas agresivo riba e aña aki, unda nan ta haci dos cos, e di prome ta paga e prijs full costo di sterilisacion pa e fundacionnan di rescate cu ta yuda pushi y cacho riba caya, anto e di dos ta paga e mitad di e prijs pa e individual cu ta adopta un cacho of pushi di caya y ta spera cu di forma aki e duna miho resultado.
Tin hopi hende cu ta registrando pa e programa di sterilisacion caba, y ta un bon señal anto tur hende mester sa y tuma consciencia pa haci esaki, sea di un mascota di raza of adopta esaki ta e solucion na largo plazo pa haci e poblacion di bestia mas chikito na Aruba.
E sistema di boluntario ta funciona caminda cu e veterinarionan ta yuda haci e operacionnan anto Bucuti & Tara Beach Resosrt cu ayuda di TPF y ATA cu otro donacionnan ta yuda cu e fondonan pa e operacionnan cu ta costa placa. E di mas importante ta e fundacionnan cu ta piki pushi y cachonan den situacion di riesgo ariba caya.
Semper mester mas voluntario y fondonan, unda cu tin costo medico, gasolin, etc entre otro gastonan y mester pa henter poblacion pa por yuda, anto e conseho ta si un hende ta wak un cacho bandona yud’e, no bay yama otro hende, sino dun’e e ayudo cu por.
Cuida pushi cu cacho , tene nan den cura y respeta e ley di cacho pasobra e ley tey pero mester cumpli cun’e y e mesun comunidad mester yuda soluciona e problematica aki. Tin un miho Task Force awo, implementa dor di e gobierno actual, y ta spera cu en berdad ta bay mira mas accion. Tin hopi voluntario cu ta duna ayudo, nan bida, tempo y nan curason pero mester un sistema hopi mas grandi unda lo por envolvi e autoridadnan den e proyecto, segun Sra. Tisa la Tore, di Bucuti & Tara Beach Resort.