Awe ta lansa oficialmente e campaña cu yama #AmigoDidi. E campaña aki ta bay enfoca riba e peliger cu automobilistanan ta pasa aden ora cu nan subi nos careteranan bao di influencia di alcohol. E por trata tambe pa droga. Segun Juendel Sprok, presidente di FADA, tin hende ta core auto bao di influencia di alcohol y e tin un efecto negativo pa nos sociedad, pa nos manera di biba, pa nos hubentud y lamentablemente esaki ta forma parti di nos cultura.
FADA a haci un investigacion dos aña pasa, caminda cu 4 studiante a bin for di Hulanda y nan a saca afo cu en berdad nos tin un problema basta serio cu coremento di auto bao di influencia di alcohol. Tabata sa caba esey door di e cooperacion cu polis hopi di cerca, pero tabata tin mester di cifra. Pa mantene un maneho mester di cifra. Y door di e cifranan aki a logra traha un plan y e plan aki tabata cla pa bay ehecut’e, pero den e transicionnan a topa cu fundacion Zinia. E bon ta fundacion Zinia a lanta tambe bao di e mesun causa, esta accidentenan causa for di alcohol, y a dicidi di bay traha hunto. Despues di varios meeting, a dicidi pa bay forma un aliansa pa asina sigui y combati e parti aki di coremento di auto bao di influencia di alcohol. FADA tabata tin mester di mas partner, tanto den e parti husticia y e parti di salubridad. Hunto a sinta y a traha riba e plan, hunto a traha riba e metanan, hunto a traha riba e logo, hunto a traha riba tur loke cu a presenta, segun Juendel Sprock di FADA.