MUSIC EXPOSURE di Cas di Cultura a presenta e weekend cu a pasa, un concierto cu a laga esnan presente un biaha mas orguyoso di nos yiu nan artistico di tera.
Hunto cu su banda, e hoben saxofonista Camilo Bastidas, a brinda su amigo y fans un ora y mey di cancion nan clasico manera “careless whisper”, “hoy tengo ganas de ti” (duo cu e super cantante Kelsey Westerburger), “Sunday morning” y “besame mucho” entre otro.
Un banda cu porcierto tawata di nivel halto!
Camilo tambe a conta su publico cu como hoben, su mayornan a regal’e di sorpresa, un saxofon for di Colombia y awe cu orguyo e por bisa cu el a ser acepta na Conservatorium di Arnhem na Hulanda.
E cancion riba su saxofon cu el a ser acepta cu ne den Conservatorium, tawata “Petit Fleur”.
Nos ta desea Camilo Bastidas tur exito di mundo na Hulanda y nos ta convenci cu Aruba su futuro musical ta sigura!
Diabierna 31 di juli 2020 ta concierto di Carlos Bislip y banda cu ta priminti di bira fantastico.