Gobierno ta den proceso di e reforma fiscal cu pronto lo mester bin na vigor y ya e minister di Finansa a anuncia di lo elimina BBO, pa bin cu e reforma fiscal. Prome Minister, Sra. mr. Evelyn Wever- Croes, ta splica.
IMF a conseha gobierno pa Aruba bay den un otro sistema, cu ta e sistema di BTW y esaki ta uno bastante complica. Y pa esaki ta tuma su tempo, sigur mas di 1 aña. Segun IMF no por haci esaki ariba termino corto. Aworaki ta den proceso si ta bay haci esaki si of no. E cambionan pa haci un sistema BTW ta uno complica. Pero entre tanto, mester trece alivio den e cartera di e pueblo y pa esey ta contemplando otro tipo di decisionnan, pa yega na e reforma cu kier yega na dje.
Pa gobierno, e reforma fiscal ta ora baha e peso di belasting directo, p.e. Loonbelasting di tur fin di luna, y cu tin mas placa den man. Y ta shift e peso pa belastingnan indirecto cu ta den e productonan cu ta cumpra. Tur fin di luna tin mas placa den man, y e consumidor ta dicidi e ora na kico ta bay gasta e placa extra. SI e kier spaar e extra aki, tambe ta valido. Tanten cu no bin un reforma, y hopi loonbelasting ta wordo kita for di e salario tur fin di luna. Ya cu belasting ta bay cu gran parti di dje. Pero gobierno lo kier pa cada ciudadano tin mas placa den su cartera, pa e dicidi kico e ta haci cun’e. Ta logra esey door di shift e belasting di directo pa indirecto. Tin cierto belastingnan, cu lo mester bay elimina, ya cu ta costa mas cu loke e ta trece placa aden, manera zegelbelasting, pero esey no ta e curason di e reforma. E curason di e reforma ta cu ta baha e belasting directo y ta pone peso ariba belasting indirecto.
Esey tin diferente manera pa yega na dje. Gobierno ta studiando e rapport di IMF, y ta preparando pa un presentacion na diferente stakeholdernan den e proximo dianan. Ta bay presenta full e conseho di IMF, unda ta wak cu e conseho ta bay hopi leu. Y hunto cu stakeholder ta bay dicidi cualnan ta bay implementa awo ariba termino cortico, mediano y largo. E reforma no ta di awo, pero ta for di 1989 ta papiando di dje. Loke no a wordo haci den 29 aña, no por wordo haci den 29 luna tampoco, e ta bay tuma su tempo. Pero ta mirando si por cuminsa trece algun alivio caba y si ta posibel, na comienso di 2019 cu algun cambio, preparando pa cambionan di termino mediano y largo.
Haci e cambio di reemplaza e BBO pa un BTW, esey no por wordo haci ariba termino corto. Awo mester pensa kico ta e cosnan chikito cu mester haci pa yega na e shifting unda cada hende ta resta mas placa ora cu nan cobra y cu e persona ta dicidi na kico ta bay gast’e e ora. Te asina leu, Prome Minister, Sra. mr. Evelyne Wever- Croes cu e relato.
