Entrante 1 di januari 2019 a drenta na vigor un cambio den e ley di reparatietoeslag pa loke ta e definicion di pensionado cu tin derecho riba e reparatietoeslag.
Entrante e fecha menciona e siguiente pensionadonan cu ta inscribi den Registro Civil di Aruba tin derecho riba un reparatietoeslag:
1. Personanan cu tin solamente un pensioen di SVb.
2. Personanan cu tin un pensioen di SVb y tin un otro entrada, pero e suma di e pensioen y di e otro entrada hunto no ta surpasa e suma di Afl. 1.132,- florin pa luna.
3. Personanan cu yega edad di pensioen y ta casa cu un pensionado y tin solamente e parti di e pensioen di SVb pa pareha cu ta coresponde na dje.
4. Personanan cu yega edad di pensioen y ta casa cu un pensionado y tin e parti di e pensioen di SVb pa pareha cu ta coresponde na dje y tin un otro entrada, pero e suma di e pensioen y di e entrada extra hunto no ta surpasa e suma di Afl. 1.132,- florin pa luna.
E suma di reparatietoeslag aki ta afl. 125,- florin pa luna.
Entrante pensioen di luna di februari, cu ta keda paga dia 1 di februari proximo, SVb ta cuminsa aplica e cambio di ley aki.
Conforme e ley menciona, SVb ta autorisa pa usa informacion di Departamento di Impuesto y di su mesun registronan di trahado pa determina kende tin derecho riba e reparatietoeslag.
Den caso cu ricibi e reparatietoeslag sin cu tin derecho riba esaki, tuma contacto inmediatamente cu Departamento di Pensioen di SVb na telefoon 527-2760.
Den caso cu su persona no ta di acuerdo cu e decision, tuma contacto cu Departamento di Pensioen di SVb pa por ricibi e decision por escrito, pa asina inicia e proceso di obhecion.