Diamars Parlamento di Aruba a trata e ontwerp-landsverordening tot wijziging van de Landsverordening toelating, uitzetting en verwijdering, esta e ley di LTU. Durante e reunion publico a atende e cambionan den e ley di admision y expulsion di nos isla y varios punto relaciona cu esaki.
Parlamentario Alan Howell durante su disertacion a duna una splicacion riba e pakico ta asina importante pa no solamente polisnan uniforma tin e competencia pa detene un ilegal, pero pa tur polis tin e competencia menciona.
Howell a indica cu polis ta keda polis, sea cu ta uniforma of no, cu tin diferenciacion di polis ta pasobra dentro di Cuerpo Policial nan ta haciendo diferente tipo di trabou, por ehempel si ta trahando como recherche no ta bisti uniform. “Na momento cu bo a huramenta como polis bo no a huramenta como recherche, bo no a huramenta como polis di trafico of como recherche di atraco, ba huramenta como algemene politie ambtenaar. Esey ta loke tur hende mester compronde bon”.
Pesey mes el a pone hopi enfasis riba cambio di articulo 33 cu ta papia di solamente di polis uniforma. Teniendo na cuenta e situacion di nos isla, e situacion di ilegal, entre mas man tin, mas herment nos tin y mas forma di traha den union, lo por soluciona hopi mas problema. Siguiendo e liña aki, parlamentario Alan Howell a pidi minister di Husticia pa haci un cambio den e articulo 33 aki, pa en bes di papia di ‘geuniformeerde politie ambtenaar’, papia di ‘algemene opsporingsambtenaar’.
Parlamentario di POR ta hopi agradecido y orguyoso di minister di Husticia pa scucha su peticion y presenta un nota di cambio di biaha, dunando asina tur polis e autoridad necesario pa detene un ilegal. Howell ta di opinion cu Cuerpo Policial lo ta contento cu e decision y ta agrega cu di e forma aki partido POR ta sigui haci un diferencia na nos pais.