Desde cu partido ABO, pa tres aña caba, a cuminsa conscientisa pueblo cu vota 1 dia pa despues no tin nada di bisa pa 4 aña largo, no ta democracia y cu nos eleccionnan mientras tanto a bira un asunto miyonario sin cu hopi ta puntra di unda e placa ta bin, awor diripiente e mesun partidonan cu a percura pa esaki, a cuminsa papia riba e falta di democracia y con disfuncional nos sistema democratico ta. Palabranan manera integridad y corupcion tambe ta wordo uza, pa asina mustra riba e maldad di ‘e otro’. Increibel pa mira con leu e politico tradicional por bay pa sigui manipula un parti di pueblo, sin admiti y asumi su responsabilidad den esaki. Ta ‘e otro’ so, ta culpabel. Pero bon, kisas cu gastando hopi miyones y uzando e aparato gubernamental como un ‘verlengstuk’ politico (pues mas placa di pueblo), e tipo di politico aki lo tin exito cerca hopi hende atrobe, segun lider di ABO, Elton Lioe-A-Tjam.
Algun luna pasa, cu hopi fanfaria, un cambio den e ‘Kiesverordening’ a wordo presenta como e solucion pa trece mas democracia den nos sistema democratico. Porcierto un bon iniciativa, pero nada mas cu esaki. E cambio proponi, den nos humilde opinion, no lo trece mas democracia, participacion, transparencia, calidad of integridad den parlamento. Den diferente comunicadonan, nos a splica cu si realmente tin e intencion pa trece mas democracia na Aruba, e asuntonan aki mester a wordo inclui tambe. Den e cambio proponi, ningun caminda algo ta wordo regla pa obliga e candidato (y/o partido) duna cuenta di unda e placa ta sali pa su campaña miyonario. Tampoco algo ta wordo regla pa sanciona e candidato (y/o partido) prome cu eleccion, si resulta cu e no por duna cuenta di e origen di e placa aki. Igual nada ta wordo regla pa porfin persigui esunnan cu ta cumpra voto of esunnan cu ta laga nan mes wordo cumpra, a pesar cu esaki ta un hecho castigabel caba pa ley.
Si nos parlamento realmente kier duna pueblo mas democracia, y nos lo ripiti’e atrobe, anto miho e elimina e obstaculo principal y antiguo cu ta limita e participacion di tur partido politico na e proceso democratico, prome cu eleccion. Den e ‘Kiesverordening’, e partidonan tradicional a percura pa pone un barera pa tur partido politico sin representacion den Staten participa na eleccion. Na momento cu oficialmente eleccion wordo anuncia, tur partido politico sin representacion den Staten, tin cu percura pa centenares di hende bay Censo personal pa firma un lista di sosten. Pues un otro forma pa laga un parti di pueblo kere cu e sistema ta democratico y cu e ta funciona. Cu e obstaculo aki, e politico tradicional a percura pa si e ciudadano kier un cambio, y lo bay cost’e tempo y placa. Y si e ciudadano ta biba leu for di Censo, mas placa e lo cost’e pa duna su sosten. Na tur pais cu ta respeta su mes y e principionan democratico, e legislado a percura pa e partido participante entrega un lista di sosten hunto cu copianan di identificacion. E paisnan aki no solamente a percura pa kita e molester for di e votado su lomba, pero tambe a duna e pueblo di e forma aki mas escogencia. E pensamento tras di esaki, ta pa haci democracia bibo y accesibel sin pone ningun obstaculo. Hasta na Venezuela, nan ta uza e sistema aki unda e partidonan ta busca firma y identificacion cu despues ta wordo controla y verifica. Anto dicon na Aruba unda tin supuestamente mas democracia, esaki no por?
Pues si realmente nos politiconan tradicional kier ta sincero cu pueblo, inclui e cambio chikito aki den e ‘Kiesverordening’ prome eleccion. Cu e cambio aki, e trabou pa Censo lo wordo facilita, lo tin mas competencia y mas democracia. Ban wak cuanto contenido ‘Sin Miedo’ tin awor!
(www.aboaruba.org, [email protected])