Camara di Comercio tin den nan plan pa bin cu un plataforma mas grandi pa negoshi cu ta creciendo, y un di e proyecto ta e idea di bin cu un Ferry cu Camara ta support 100%.
E reunion di Camara di Comercio hunto cu San Nicolas Bussines Association a bay den un ambiente hopi ameno y fructifero.
Camara di Comercio tin den nan plan pa bin cu un plataforma mas grandi pa negoshi cu ta creciendo, y un di e proyecto ta e idea di bin cu un Ferry cu Camara ta support 100%. Esey ta algo cu por haci awor si e will t’ey. Esaki por ta cla den un luna di tempo, si den caso cu en berdad tin e intencion t’ey pa esaki.
Lo cual Camara ta sinti ta cu San Nicolas tambe mester cuminsa bringa pa nan mesun proyecto y cu no por keda bin campaña cada 4 aña si nan a yega di vota pa un par di Minister. E ora nan mester deal cu esaki.
Awor aki tur hende ta core pa San Nicolas y Camara di Comercio semper tabata tin e den nan plan y tin un relacion cu SNBA. Nan ta bringando mas cu nunca pa logra bon resultado y ta bezig cu gobierno y diferente stakeholdernan pa wak con pa haci San Nicolas un tiki mas viabel.
San Nicolas no ta manera Oranjestad, pero eynan por trece cu un Research and Development Divison di un compania grandi. Por bin cu housing tambe eynan pasobra tin hopi tereno cu por traha hopi cosnan, inclusive tiki mas grandi cu pabao di brug, y haci di dje e Sillicon Village di Aruba of di Caribe.
Esaki ta parti di cosnan cu Camara di Comercio ta bogando pe pa haci gobierno consciente di dje. A papia cu entre otro cu Sra. Valery Croes di Innovation Officer y a duna hopi aporte di tur e ideanan aki, cual ta wordo traha ariba nan. Camara di Comercio ta forma parti di varios comision di gobierno.
Esey ta parti di e cosnan cu Camara di Comercio ta bringando pe. Pero esakinan mester wordo atendi e urgencia un tiki mas lihe, mirando cu e hendenan aki ta sufriendo basta for di ora e refineria a cera. Tin un cantidad hopi limita di localnan cu mayoria ta cera of bashi, y tin otro ta habri un par di oranan so, caminda cu actualmente tin un bon restaurant so activo y un par di snackbar so.
Riba esaki mester trece e bida ey bek a traves di e ambiente y negoshi cu no mester ta refineria. Djis bin cu un par di proyecto manera e caso di ferry por traha dilanti un water front mall tambe, y hasta un hotel chikito pa hende cu no kier keda banda di e beach, entre otro.
Por trece dilanti e ehempel di Caya Betico Croes na Oranjestad, unda cu a wordo inverti miyon florin pa pone un tram pa trece turista di e cruceronan den Centro di Oranjestad y awor tur tienda ta cera. E ora si Oranjestad nan mes tin problema cu 3 of 5 mil turistanan cu te drenta di cruceronan, kico ta bay cu San Nicolas e ora.
Sr. Mohamed ta splica riba esaki cu esey ta caso di turista di barco crucero, anto cu e turista regular cu ta bin ta keda un siman, caminda cu banda di South Beach por a wak cu semper tin movecion y eynan ta si draai bon. Si por logra deal cu e turista pa bay trip un anochi na South Beach, un na Oranjestad anto un na San Nicolas toch ta bay haya un tiki di circulacion di e placa.
Despues di esaki mester wak con pa logra trece e turistanan bek, mirando cu Gelatisimo cu ta bayendo bon, mescos cu Zara y Mango cu tambe ta bay bon. Tin cierto comercio cu ta haciendo bon negoshi anto mester wak riba esaki pa tur comercio logra bay bon, pero den todo caso awor aki e comision nobo hunto cu Camara di Comercio ta bay bin cu ideanan definitivo pa cuminsa traha den e areanan. Esey ta canando su caminda caba y stepnan ta wordo tuma, segun Sr. Ernst Mohammed, di Camara di Comercio.