Camara di Comercio y Industria Aruba (KvK) hunto cu Camara di Comercio y Industria Haiti-Benelux (CCI Haiti-Benelux) a organisa di 15 pa 18 di November un programa pa e mision comercial caminda cu varios comerciante Haitiano a bishita nos isla cu e fin pa conoce y crea oportunidadnan di negoshi cu nos comerciantenan local.
E prome dia e delegacion di Haiti a haya e oportunidad pa cera conoci cu diferente empresa y instancianan local. E empresanan aki ta interesante pa e delegacion pa por haya un bista riba con ta haci negoshi na Aruba y unda e oportunidadnan ta sinta. E delegacion di Haiti a bishita entre otro KvK caminda nan a haya un palabra di bon bini door di President, Sra. Daphne Agius Cesareo-Lejuez y un presentacion duna door di Sra. Sonja Velthuizen, Directora di KvK. Despues e delegacion a bishita APA, TNO, Balashi, ATA, ATIA y Freezone. Nan a keda hopi entusiasma cu tur e diferente presentacion cu nan a haya na e diferente localidadnan empresarial rond Aruba.
E mes anochi na Divi Beach Bar tur e comerciantenan di Haiti a haya e oportunidad pa expone nan productonan caminda invitadonan por a bin y conoce di cerca e variedad di productonan cu ta wordo produci na Haiti. Tabatin diferente artesania y tasnan decora, bebida y cuminda manera pasta y corn flakes pa nombra algun. E anochi tabata uno cu un toke cultural Haitiano caminda cu e Consul a dirigi algun palabra y despues di esaki esnan presente a wordo deleita cu un presentacion di bailarinanan di Haiti.
E siguiente dia tabatin oportunidad pa cera lasonan comercial cu companianan local. KvK a organisa B2B meetings cu a tuma luga den e auditorium y meeting room di KvK caminda cu a invita diferente empresa local cu lo por ta interesante pa nos bishitantenan di Haiti. For di mainta te atardi diferente cita a tuma luga y a intercambia diferente ideanan y e tabata hopi exitoso.
E anochi a brinda e delegacion un oportunidad unico pa un experiencia cultural, caminda cu nan a bishita San Nicolas pa haya un tour di e Museo di Industria y despues di e tour a sigui pa Carubbian Festival y a goza di e ambiente.
KvK kier gradici Sr. Sergio Valkenburg di CCI Haiti-Benelux y tambe Sr. Herve Saint-Louis, Consul di Haiti na Aruba pa nan aporte na haci e mision comercial aki posibel. Tambe un danki na tur e empresarionan di Aruba cu a haci e B2B meetings un exito y sigur un bunita experiencia pa e delegacion di Haiti.