Mirando cu nos a drenta e ultimo luna di 2016 Camara di Comercio y Industria Aruba (KvK) kier a tuma e oportunidad aki pa recorda tur empresarionan riba e siguiente obligacionnan stipula pa ley cu ta di importancia pa nan negoshi.
Mantene datonan y pago up to date
Nos kier a recorda tur empresario cu pa ley e ta un obligacion pa nan tin tur dato di nan negoshi den e registro di KvK up to date. Por verifica esaki via www.arubachamber.com. Pa ley e ta un rekisito cu tur cambio den e structura y maneho di un negoshi mester wordo adapta y poni up to date den registro di negoshi. E ta importante pa e informacion den e registro di negoshi ta cuadra cu realidad. Di e forma aki KvK por a la vez informa e comerciante encuanto eventonan di comercio, workshops, presentacion, misionnan comercial y diferente desaroyonan relevante pa e empresario. Ademas e ta interesante pa inversionista y partner comercial cu lo kier bin den contacto cu e empresario pa posibel colaboracion y oportunidadnan comercial. Cu e dato corecto bo ta contribui tambe na datonan mas confiabel den e registro di negoshi y asina por haci un miho analisis di e negoshinan existente na Aruba y e diversidad economico actual. Di e forma aki KvK lo por brinda mihor servicio na e comunidad comercial di Aruba.
KvK kier recorda riba e contribucion anual conforme ley pa negoshinan registra na KvK. Tur comerciante ta wordo encarecidamente pidi pa percura pa esaki tambe wordo paga na ora y asina evita gastonan cu no ta necesario. Ora un negoshi no ta cumpli cu e pago, esaki lo refleha den e extracto di e negoshi. Cierto servicionan di KvK lo no ser brinda pa motibo di cuentanan habri. KvK lo manda recordatorio y eventualmente lo opta pa sigui caminda legal pa cu falta di incumplimento. Si contribucion anual no ta cancela, esaki ta haci tambe cu e empresario no lo haya informacion pa por eherce derecho di voto.
Compania cu no ta existi mas
Si bo tin un compania registra na KvK pero esaki no ta activo mas, e ta importante pa bo informa esaki cerca KvK no mas tarda cu 30 di December, pa pone esaki como inactivo of saca e negoshi for di registro di negoshi. E ta importante pa un negoshi cu a cera, tambe wordo saca di e registro pa evita mas gasto innecesario. Solamente ora a elimina e negoshi for di registro di KvK, e ora no lo mester paga contribucion anual mas. Pa ley un negoshi cu ta registra como activo tin e obligacion di paga e contribucion anual di e registro di negoshi. Tambe bo ta evitando gastonan cu bo ta haya bo cune door di mester declara resultadonan di negoshi na Servicio di Impuesto.
Prepara e relato financiero anual na tempo
Pa ley tur negoshi cu tin e forma jurídico AVV, VBA of NV mester entrega nan relato financiero. KvK ta recorda tur empresario pa cuminsa na tempo y asina evita dolor di cabes pa por cumpli cu e rekisito aki. AVV, VBA y NV cu no ta activo den operacion di negoshi, es decir ta inactivo, tambe tin e obligacion pa deposita nan relato financiero. Ta te ora disolve e persona huridico mes e obligacion ta stop di existi.
Nos kier manda un recordatorio cu si a pidi pa pospone e fecha pa deposita y no a entrega ainda, cu e ultimo fecha pa entrega ta 28 di Februari 2017.
Hunto cu e relato financiero anual, tur AVV, VBA y NV ta rekeri pa entrega un copia di nan registro di accionista na KvK, dentro di 8 luna despues cu e aña fiscal termina. Tene cuenta cu no tin posibilidad di pospone e entrega di e registro di accionista.
Doño di negoshi, director y otro miembronan di board cu no tin nan informacion of contribucionnan na ordo por wordo poni responsabel pa negoshi cu no ta cumpliendo cu ley. Pa por sa mas encuanto datonan den registro y cuentanan habri, por tuma contacto cu KvK na 582-1566 of manda un email pa [email protected]. Tambe por pasa libremente durante orario di oficina di 8:00 am pa 4:30 pm.