Manera por lesa den diferente media e dianan aki, tin un desacuerdo entre 2 grupo encuanto e directiva di Partido Democracia Real (PDR). Camara di Comercio (KvK) ta lamenta cu kier involucre den e disputa aki. KvK ta un organo imparcial y su funcion ta stipula pa ley.
Caso en cuestion KvK no tin e autoridad pa tuma un decision encuanto e peticion relata na e directiva di PDR. KvK ta mantene e Registro segun ordenansa di ley y ta referi na e Handelsregisterverordening. Articulo 16 ta bisa cu pa situacionnan similar na esun di PDR, e caminda pa cana ta via un peticion cerca hues. Unabes cu e decision oficial di hues yega cerca KvK, lo cumpli cu esaki.
Pa tur claridad, KvK kier informa cu ningun miembro di Directiva di KvK tin autoridad of aceso na e Registro. E Secretaris di Directiva so por tuma decisionnan cu tin di haber cu e Registro, y esaki conforme cu ley di Registro. E Directiva di KvK tin autoridad riba e maneho strategico di KvK pero no riba e funcionamento of maneho di e Registro.
Pa KvK e ta importante pa mantene su integridad y e maneho di e informacion den e Registro segun ta wordo stipula door di ley.