Cu e prome mita di 2016 tras di lomba Camara di Comercio y Industria Aruba (KvK) kier trece dilanti e cifranan di e Registro Comercial pa duna un bista di e desaroyo durante e ultimo añanan. E prome 6 luna di 2016 ta mustra cu e total di registracion a baha cu 70 cual ta un caida di 10% compara cu e prome 6 luna di e aña anterior. Na 2015 a registra un total di 680 empresa di cual ningun ta Offshore y na 2016 a registra 610 di cual uno ta Offshore.
E caida den e total di registracion ta wordo ocasiona door di e cantidad di registracion pa Naamloze Vennootschap (NV) y Eenmanszaak. Registracion pa lanta un NV a bai atras cu 20 registracion den 2016 y Eenmanszaak tin 50 registracion menos compara cu e mesun periodo pa 2015. Pa loke ta e otro sorto di registracion, e cantidad di registracion a keda practicamente mescos. Durante e ultimo añanan Vennootschap met Beperkte Aansprakelijkheid (VBA) a conoce un aumento di e cantidad di registracion y por tuma nota cu pa 2016 esaki a keda na 170. KvK ta duna di conoce cu e motibo di popularidad di VBA ta bin door cu bo por lanta un VBA bo so, sin ningun tipo di partnership, pero bo mester ta residencia na Aruba. E ta mas flexibel den su structura di maneho. Bo no ta rekeri un suma minimo di capital, bo ta liber pa scoge e idioma pa e decreto, sea Papiamento, Hulandes of Ingles. Un notario civil ta rekeri pa registra e VBA pero cambionan den su constitucion no necesariamente mester bai via un notario. E tipo Aruba Vrijgestelde Vennootschap (AVV) y Vennootschap Onder Firma (VOF) ta keda un tipo cu no ta hopi popular y en particular AVV cu ta un forma legal pa offshore business, ta sigui mustra cu no tin hopi registracion nobo pero si mas cancelacion ta wordo registra.
KvK por conclui cu e echo cu tin menos registracion di negoshi na Aruba durante e prome mita di 2016 por tin un posibilidad cu esaki ta bin door cu tin menos confiansa pa lanta un negoshi of tin un drempel socio-economico cu ta impedi esaki. A base di cifranan y dato colecta di encuesta di CBA cu e consumidor por haya e indicacion cu e situacion financiero di e consumidor no ta esun mas faborabel. Esaki ta haci cu e poder di compra ta keda abao y asina tin menos incentivo pa un comerciante (existente of potencial) habri un negoshi.