Segun presidente di Camara di Comercio, Daphne Agius Cesareo-Lejuez, e instancia aki lo bay yuda comercio bira mas activo den nan sistema di mercadea nan negoshi. E ta sigui splica cu como Camara di Comercio ta bay ta un tarea pa mira kico y con por yuda e comerciante cu e desaroyo aki, cu e reto aki, mirando cu e ta dificil.
Como Aruba so, ta deal cu esaki. Henter mundo, Europa, Merca, tur ta deal cu e fenomeno di benta online. Nos ta sintie mas ainda, mirando cu no ta produci nada y ta importa tur cos y e costo ta halto di importacion. Tambe tin e “economy of scale” mirando cu nos ta un isla chikito, mayoria comerciante no por haci compra grandi pa haci un miho prijs. E mercado ta mas chikito. No por compara un Amazon cu un tienda chikito cu ta bende sapato a Aruba.
E prijs ta bay ta diferente, logicamente.
Locual cu si por haci ta enfoca mas riba e added value. Na final di dia, un persona ta prefera di no mind e servicio. Si e persona ta dispuesto pa warda dos siman pa un mercancia, e comerciante tambe por yud’e. Y busca e mesun prijs p’e, dun’e servicio y garantia, deliver pe. Haci tur e tramite pa su cliente. Kisas mester reinventa e manera con ta haci negoshi. Esakinan ta topiconan cu segun Lejuez, den 2017 lo toca mas di cerca y lo invita comerciantenan tambe pa scucha ki posibilidad nan tin, wak ken tin success stories, con por siña di dje, con pa yuda otro comerciantenan. E lo ta un enfoke pa 2017 sigur sigur.
Camara di Comercio lo haci di su banda, pa purba invita e comerciantenan cu success stories, pa duna nan charla y tambe pa duna e informacion necesario pa nan desaroya mas aleu, el a comenta.