Servicio Meteorologico Nacional (di Merca) a lansa un advertencia serio pa costanan oost y west cu ta valido pa henter e fin di siman. Y ta pone casi mita di e pais bou di alerta di calor y potencialmente kibrando temperaturanan record diariamente.
Noordwest y noordoost di Pacifico lo por kibra e maximo historico diario awe, segun e pronostico.
Casi 58 miyon di persona ta bou di advertencia di calor excesivo, cu e principal ciudadnan manera New York, Philadelphia, St. Louis, Kansas City, Seattle y Portland.
Nan a bisa cu e indicenan di calor den e areanan menciona ta varia entre 37,8 y 43,3° C, cu algun biaha te na 46 grado.
E calor ta wordo sinti na henter e costa west, concentrando riba noordwest di Pacifico un biaha mas. Ta pronostica cu e temperaturanan den e region lo subi di 6 pa 12° C riba e averahe y e calor seco y cayente lo keda te cu fin di siman.
Esaki ta e di dos gran ola di calor na noordwest di Pacifico e zomer aki. Na juni, e temperaturanan record di tur tempo a wordo supera ora cu na ciudadnan manera Seattle e calor a yega te na 42° C, mientras cu Portland tabata horna bou di un calor sin precedente di 46,6°C. Durante e e periodo aki, tabatin cantidad di hende cu a yega sala di emergencia debi na sintomanan relaciona cu calor y otronan cu a fayece despues.
Hopi hende ta acudi na awa pa busca alivio di calor, pero haciendo esaki nan por enfrenta otro peligro. Hinca bo mes den awa “friu” por ta mortal, si e persona no ta prepara pa e exposicion repentino cu e efecto di esaki por causa na curpa y cerebro.
E calor di curpa ta perde su temperatura 25 bes mas rapido den awa friu y por conduci na hipotermia. Den e regionnan noordwest di Pacifico, unda e temperaturanan halto ta poco comun, hopi persona masalmente ta bay costa.
E temperaturanan di aire mas halto ta aumenta e posibilidad di sufri un golpi di friu ora di drenta den awa, loke por causa cu e musculonan ta bira rigido y e personanan por hoga.
E olanan di calor ta cada bes mas cayente debi na e crisis climatico. Cu 2° Celsius di keintamento global, e temperaturanan mas halto lo yega casi 3 grado Celsius (5 grado Fahrenheit) mas halto cu e olanan di calor anterior.