E percepcion ta cu e temperatura riba e thermostat ta hopi halto, pero en realidad e no ta diferente cu aña pasa.
Esaki ta e periodo cu pueblo ta custumbra cu e temperatura ta subi. Segun sr Barkmeyer di Meteo Aruba, for di juli caba a saca un comunicado den cual ta informa cu mester ta hopi cauteloso den e lunanan di Juli, Augustus, September y te hasta inicio di October pa e calor inmenso cu por bay sinti.
Segun el a conta, e maximo cu nan a registra e siman aki na Meteo tabata 34 grado, pero ta berdad c e hendenan por sinti cu ta haci hopi mas calor. Esaki ta pa motibo di e incidencia hopi halto di solo mientras cu biento mes a baha un poco. “E solo den e dianan aki ta straight riba nos. Tur esaki ta causa cu e hendenan ta sinti mas calor,” el a bisa.
Awe den careda di 1.30 di merdia e aparato di midi calor na WEB tabata para na 37 grado Celsius.
Pa loke ta tormenta tropical, no tin nada den cercania di Aruba. Tin un fenomeno den Caribe pero tan a 1350 km oost di Islanan Ariba, casi e mesun rut cu Freddy. Pues hopi leu di Aruba.
Ta consehabel pa e dianan aki cu ta haci hopi calor, pa bebe hopi awa. No cana pafo na momento cu e solo ta hopi halto y bisti pañanan fresco.