Instituto Biba Saludabel y Activo, IBiSA ta publica su Calendario di Evento pa 2017. E version aki ta uno basico cu por tin cambio den su contenido, despues den luna di April. Tur actividad cu ta aparece riba e Calendario di Evento pa e prome tres luna di aña 2017 ta oficial y tin tur prioridad organisativo.
Cualkier instancia cu ta desea di manda un peticion pa un actividad ainda durante e prome tres luna di aña, lo por haci esaki pero e no ta bay aparece riba e calendario di IBiSA.
Ta acepta peticion pa actividad cu ta tuma lugar den luna di April en adelante. Y esakinan lo wordo procesa y anuncia den e calendario di IBiSA respectivamente. Sa sosode cu den transcurso di e lunanan mas actividad ta wordo añadi, di organisacion of instancianan cu ta pidi e cooperacion y asistencia di IBiSA na tempo.
Nos ta recorda cu e formulario di peticion pa organisa un actividad ta obtenibel na oficina principal di IBiSA situa na Frankrijkstraat 1. E formulario mester wordo yena y entrega bek. Pa mas informacion por tuma contacto semper cu ‘afdeling School Sport en Recreatie’, cu sr. William Erasmus na oficina di IBiSA. E ta localisabel na telefoon 582 49 87 of por manda un e-mail na [email protected].
IBiSA su Calendario di Evento 2017 ta wordo publica despues riba Facebook y manda tambe via Twitter y Snap Chat.IBiSA Calendar 2017