Manera ta custumber pa añanan caba diferente centro di bario, establecimentonan y organisacionnan ta organisa varios evento cultural rond nos isla den cuadro di celebracion di nos dia nacional di Himno Y Bandera. Riba 18 di maart nos ta celebra cu na aña 1976 nos a inaugura oficialmente nos Himno, Aruba Dushi Tera, y Bandera.
Den colaboracion cu Departamento di Cultura di Aruba y comunicadonan riba rednan social, Aruba Tourism Authority a crea un calendario di evento pa cu esaki. Asina un y tur por tuma nota di kiko tur tin pa haci riba 17 y 18 di maart. E calendario di evento aki tambe lo wordo comparti na nos bishitantenan via canalnan existente, asina encurashandonan pa tambe forma parti di nos gran celebracion, y experencia nos bunita cultura.
Pa prome biaha A.T.A. ta crea un calendario di evento digital usando Google Maps, algo nobo y sigur uno innovativo. Via e pagina di Facebook, Oficina di Turismo, A.T.A. lo ta compartiendo un link unda por wak tur evento riba e mapa di Aruba cu tur informacion necesario. Asina ta facilita tur cu tin un smartphone pa naviga e diferente eventonan den cuadro di dia di Himno y Bandera. Ademas, A.T.A. lo ta agregando mas evento na e mapa di Aruba durante dia asina esaki yega na nos atencion.
Cu e calendario di evento A.T.A. kier invita pueblo henter pa sali y celebra nos dia nacional conhuntamente cu famia y amigonan. Por subi nos pagina di Facebook (Oficina di turismo) pa mas informacion. Si bo evento no ta aparece riba nos lista, por manda un email cu e informacion di esaki pa Ms. Boekhouwer [email protected] pa asina agrega esaki ainda.