Sr. Jason Schmidt, Hoofd Commissie di Aduna a splica con ta calcula prijs di esunnan cu ta busca producto online y dicon ta bon pabo informa bo mes di e ley di calculacion di trece producto Aruba. Hopi hende ta pensa loke nan ta skucha di coleganan di Aduana y nan ta haya un idea di e tarifa cu nan kier cumpra.
Como ehempel, Sr. Schmidt, ta uza un laptop, cual ta paga 12% di invoerrechten. Pero pa Aduana ta basa su mes ariba e prijs di factura di un laptop, unda nan ta calcula ariba e prijs di e laptop, mas e freight, mas e seguro. Si esaki a costa 20 dollar, pa e yega na Aruba. Si no a paga seguro, Aduana ta calcula un percentahe, y e ora di e prijs total, ta calcula e total. Aduana ta calcula e CIF waarde.
Lo ta bon pa un persona informa su mes bon, prome cu e manda cumpra algo di afo. Cumpra online kisas ta sali mas barata, kisas e freight por sali halto. Pero e comerciantenan cu ta cumpra den bulto, den container, nan freight ta baha mas, cu un solo producto. Ta bon evalua y haci e calculacion si ta combini pa cumpr’e online of cumpr’e local. Si trece un solo producto, ta sali mas caro. Tur esey ta hunga un factor.
Aduana tin un buki di tarifa, cu tin un percentahe pa tur e productonan. Loke ta ser cobra ta loke ta e prijs cu ta bon di afo abase di esey ta cobra y no ta cobra e parti di trece e producto te na Aruba. Aduana no ta cobra ni pa hanchura ni haltura. Cada compania tin nan tarifa pa cube, y esey ta varia. Pero pa Aduana na final, nan ta wak solamente e gastonan total pa ela yega Aruba. Loke pasa local, nan no ta cobra. P.e. si e compania cu a bestel e via E-post y nan tin un suma pa haci e papeleo di Aduana, di p.e. 100 florin. Esaki no ta bay ariba e balor di Aduana. E prijs di Aduana ta tur loke bin di afo, te cu e yega Aruba. Balor di Aduana ta e curason di Aduana. Semper e tabata asina, e no ta nada nobo. Solamente cu hopi hende no sa con pa calcula esaki. Solamente un broker cu sa di e tarifanan di Aduana, sa con pa calcula e prijsnan di Aduana. E importadonan, y companianan di carga, nan sa con pa calcula esaki. Un ciudadano por bay ariba e website y busca informacion aki riba pa sa con pa haci e calculacion.
Sr. Schmidt a enfatiza, cu Aduana no ta cobra pa haltura ni hanchura. Si e persona kier bin cu’n frigidaire of un lessenaar, cu ta tuma mas espacio, esey ta keda na cada compania pa cobra pa cube. Ta keda na cada persona, pa busca e compania cu ta ofrece e miho prijs pa trece e productonan for di afo, segun Sr. Jason Schmidt, Hoofd Commies di Cuerpo di Aduana.