Carnaval a ranca sali exitosamente 11-11 y Stichting Musica tambe ta cla pa otro grandioso temporada di carnaval organisando a peticion di musiconan un fundraising event – “CaiSoca Softball Bash”.
Sigur hopi di boso por corda e tremendo evento di Softball cu Stichting MUSICA a organisa ultimo biaha, unda musico nan a bin hunto y a biba un gran union entre nan tur riba un solo dia hungando softball a gosa y baila hunto. Awel a peticion di nos propio musiconan nos ta cla pa e siguiente encuentro di Softball.
Esaki lo tuma lugar:
Diadomingo 4 di December na veld di Madushi Stars – San Nicolas.
Aki lo bay tin diferente team di softball cu ta bay bataya contra otro pero e spotlight di e evento lo ta ora cu nos bandanan local midi forsa riba veld.
No ta cos di perde!
Stichting Musica ta invita pueblo di Aruba en general y specialmente e fanclub di e bandanan pa bin apoya boso team di softball. Pa anima e publico presente y pone nan baila tambe ta entre otro Caribbean Band, Provoke, Loud, Hot Ones, Buleria, Tsunami y Le Groove.
Pa nos muchanan tambe lo tin Dinojump y sin lubida e Bar y Cushina cu lo ta bon surti di comienso te final.
Asina ta mark’e dia riba bo schedule yama famia bin hunto, agrupa coleganan, prepara e fanclub pa nos topa y haci e fundraising event aki di Stichting Musica e “CaiSoca Softball Bash” un tremendo exito.
For di awor caba nos ta manda gradicimento na tur nos sponsornan cu a yuda pa haci e actividad aki posibel.