E campeonato di Basketball Escolar den categoria B-mucha homber organisa pa IBiSA a finalisa diaranson atardi cu weganan sumamente interesante cu a tuma luga den Centro Deportivo Betico Croes na Sta. Cruz.
E atardi tabata hopi anima y ya caba for di cuminsamento di e prome wega te na e ultimo wega, por a sinti e presion y e tension den e weganan. E prome wega a cuminsa pa 2:30 p.m. y tabata entre e muchanan di St. Michael/Colegio Cristo Rey y esnan di Scol Basico Washington. Ambos scol a bataya fuerte contra otro den un bunita wega, dunando nan fanatico hopi nervio. Tur dos scol a bin bon prepara cu tremendo apoyo y sosten di nan fanaticonan, cu por cierto a disfruta di un bunita wega di basketball. E wega aki tabata pa defini e scol ganador di e di tres y di cuater luga. Despues di e bunita wega y e tempo reglamentario, e wega ta termina 16 punto pa 11 na fabor di Scol Basico Washington logrando asina e di tres luga. St. Michael/Colegio Cristo Rey ta finalisa e campeonato na di cuater luga. Top scorer di e wega tabata e hoben Jaythan Crouch di Scol Basico Washington cu e total di 8 punto.
E siguiente wega a cuminsa pa 3:15 p.m. y esaki tabata e wega pa e titulo di campeon. E muchanan di Caiquetio School a subi cancha pa hunga contra e muchanan di St. Paulus School. E ambiente den Centro Deportivo Betico Croes tabata dushi y tur dos scol a haya un tremendo apoyo di parti di e fanaticonan, cu a anima nan henter e wega. Sigur e ta haci un efecto positivo ora cu fanaticonan acudi na grupo y apoya tur cu tin, creando un ambiente deportivo hopi anima den e sala. E wega riba su mes a pone masha hopi tension den tur hende cu tabata den Centro Deportivo Betico Croes, dunando juffrouw Mandy y meneer Bryan hopi trabou y presion pa mantene e muchanan concentra den nan wega. Den e prome tempo di wega, e muchanan di St. Paulus School a sali basta agresivo y dicidido riba cancha y ta anota 6 punto y nan no a permiti e muchanan di Caiquetio School anota ningun punto. E di dos tempo di wega a sigui y aki ta unda cu e muchanan di Caiquetio School a lucha duro pa cada hugada y nan ta logra anota 6 punto, mientras cu nan ta permiti e muchanan di St. Paulus School anota 4 punto. Den e di tres tempo e wega a cuminsa bira hopi mas interesante. Ambos scol ta anota 6 punto y ta haci e score bira 12 punto contra 16 na fabor di St. Paulus School cu tabata mantene e wega duru pa nan. Pero tur cos ta cambia den e di cuater tempo, ora cu e muchanan di Caiquetio School a subi cancha y ta controla e bala y mantene e dominio continuamente. Asina nan a cuminsa anota nan puntonan y ta logra empata e wega. Na mes momento, riba e siguiente hugadanan nan ta anota pa desempata y ta bay ariba den punto pa gana e wega. E score final ta keda basta preta cu 21 punto pa St. Paulus School, mientras cu e muchanan di Caiquetio School ta finalisa cu 22 punto y asina ta titula Campeon Nacional di Basketball Escolar 2016-2017 di Enseñansa Basico mucha homber. St. Paulus School ta keda na di dos luga. Dos scol campeon a enfrenta otro y nan a pone hopi nerviosismo den e publico cu a haya un bunita wega pa mira.
E scolnan ganado a ricibi nan respectivo medaya di prome, di dos y di tres luga, mientras cu
Caiquetio School ta ricibi e Copa Rotativo di Campeon. Mester añadi cu Caiquetio School ta yega final y ta titula campeon, ganando tur wega. E topscorer di Caiquetio School a resulta e hoben Sean Edwards cu a anota 10 punto. Pa un reportahe amplio di potret por bishita IBiSA su Facebook page.
IBiSA ta felicita tur scol cu a participa, como tambe tur mayor y maestro cu a bin apoya y duna sosten na nan scol durante e Campeonato Escolar di Basketball pa mucha homber. Un gratitud special ta bay na e hoben referee, Christopher Pantophlet cu a fluit mayoria di e weganan. Caiquetio School tin e tarea awor pa sigui train y mehora aun mas nan tremendo habilidad den basketball, pa bay representa Aruba na e ‘Weganan Interinsular 2017’ cu ta tuma luga den luna di Maart na Sint Maarten.