NEW YORK, Merca- E legendario capo Mexicano di droga, Joaquin ‘El Chapo’ Guzman diamars a wordo haya culpabel di e 10 delitonan di cual e ta wordo acusa di dje, cualnan ta liderazgo di un imperio criminal cu a trafica varios ton di droga pa Merca durante 25 aña, y pa esaki e lo enfrenta cadena perpetua según leynan Mericano.
Despues di e veredicto lesa pa e hues Brian Cogan den corte federal di Brooklyn, e ex hefe di e Cartel di Sinaloa, di 61 aña, a bira wak su casa hoben, Emma Coronel, mama di su yiunan morocho di shete aña, a smile un poco como sifuera e tabata kier a trankilisa su casa y a pone man na su curason.
Coronel, di 29 aña, bisti cu carson preto preta y un jacket berde, a hisa su duim di su man drechi, a crusa su mannan na su pecho y a manda un sunchi pe prome cu e polisnan a retira Chapo for di e sala.
Despues di un proceso largo cu a dura tres luna y 35 hora di deliberacion durante 6 dia, e hurado a declara e acusado culpabel di e 10 delitonan di trafico di cocaina, heroina, metanfetaminas y marihuana pa Merca, como tambe e uzo di arma di candela y labamento di placa.
Dor di declar’e culpabel di ta na cabes di un empresa criminal cu su metanan di traficacion di droga, e hurado a considera cu e gobierno Mericano a prueba cu El Chapo tabata un di e lidernan di e cartel di Sinaloa, cu a trafica al menos 150 kg di cocaina y a gana mas di 10 miyon dollar door di narcotrafico den 12 luna, cual según leynan Mericano ta establee un sentencia obligatorio di cadena perpetua.
El Chapo a wordo haya culpabel tambe di 25 di e 27 violacionnan di cual e tabata wordo acusa, incluyendo plannan di asesinato den cuadro di narcotrafico.
El Chapo, extradita pa Merca dos aña pasa, ta wordo considera e capo di narco mas famoso na mundo desde e morto di e Colombiano, Pablo Escobar.