BETHESDA, Maryland, EE.UU. (AP) — Un robo di dato door di un kiebro den e sistema di siguridad di e imperio hotelero mundial Marriott a pone informacion di te cu 5 00 miyon guest. Den algun caso,e kiebro aki a pone number di creditcard, number di paspoort y fechanan di nacemento den peliger, segun e compania a informa diabierna.
E compania a informa cu tabata tin un acceso no autorisa na e red di su hotelnan Starwood desde 2014 y cu posiblemente e hackernan lo a copia numbernan di creditcard y fechanan di vencemento di esaki, di algun huesped. Esaki lo por ta un di e filtracionnan di dato mas grandi cu a yega di wordo registra.
Marriott a cumpra Starwood na 2016 y e proceso di fusion di su sistema informatico cu ekiponan di Starwood a hay’e confronta cu’n sin fin di problemanan tecnico.
“Nomber, adres, number di passpoort y otro informacion personal confidencial exponi ta motibo di preocupacion enorme ya cu e informacion di pago tabata ecripta”, segun e analista Ted Rossman di CreditCards.com. “Hendenan lo mester preocupa pa delincuentenan por uza e informacion aki pa habri cuentanan falso na nan nomber”, el a bisa.
Marriott International Inc. a descubri e hecho aki a trabes di un persona cu a copia y a encripta e datonan di e huespednan y a purba di kita esaki.
Director general di Marriott, Arne Sorenson, a bisa diabierna den un comunicado cu Marriott ainda ta purbando di descontinua di e sistemanan Starwood.
E compania a habri un portal y un centro di yamada pa cualkier persona cu ta pensa cu su informacion por ta den peliger y diabierna a cuminsa manda email pa esunnan afecta.