ZAGREB, Croacia- Diasabra polis di e localidad di Mala Subotica (Croacia) a haya u curpa den e freezer di un cas, caminda cu’n pareha ta biba cu nan tres yiunan. “Nos ta supone cu e curpa haya den e freezer ta di e muhe naci na 1977 y denuncia di su desaparicion a wordo entrega dia 16 di augustus 2005”, e vocero di polis regional, Nenad Risak, a informa na AFP.
Aunke e nomber di e defunto no a wordo revela pa autoridadnan, prensa local ta bisa cu aki lo por trata di Jasmina Dominic, cu tabata biba na mesun cas ey pero cu a disparce na 2000, tempo cu e tabata tin 23 aña.
Prome cu el a disparce Jasmina tabata studiando den e capital Croata y supuestamente a avisa su famia cu e lo bay traha ariba un crucero y cu e tabata tin pensa di bay biba na Paris (Francia). E desaparicion di e hoben a wordo raporta na polis, cinco aña despues.
Detectivenan ta sali for di e punto di bisa cu aki por trata di un asesinato, aunke ainda ta sperando e resultadonan di e autopsia pa e conclusion final. Den cuadro di e investigacion, diasabra anochi polisnan a aresta un muhe di 45 aña, Mala Subotica, e vocero a agrega.
E vocero a nenga di identifica e muhe cu a wordo aresta, no obstante medionan local a informa cu ta trata di e ruman muhe di e victima, cu ta biba den e cas unda nan a haya e cadaver. Prensa local ta sigui bisa cu e curpa supuestamente a wordo haya pa e casa di Smiljana, despues di cu coriente a cay afo y e freezer a cuminsa manda un holo desagradabel.