Diabierna siman pasa, Bureau City Inspector a haya un melding di cu lo tin un cacho mara. Ora cu a yega na e sitio no tabata e caso, tabata dos cacho cu tabata full deshidrata, sin awa y sin cuminda. Sr. Robby Rosel, vocero di BCI ta relata.
Tabata trata no di un, pero dos cacho cu tabata mara den e solo, na un cadena masha cortico,sin awa y sin cuminda. Mesora e team di trahado di Bureau City Inspector a cuminsa mobilisa. nan a yama e fundacion pa bishita e sitio. E fundacion a presenta y a laga cuminda pa e cachonan.
Dialuna nan a bolbe bay na e cas, unda cu nan a topa cu e doño e biaha aki. Esaki a declara cu e cachonan ta eynan mara y na cadena cortico, door cu nan ta bringa cu otro. El a bisa cu e ta duna e cachonan cuminda. Pero esaki no tabata e caso.
E ora a bay corte y aki a dicidi cu lo kita e cachonan for di e doño y entrega na e fundacion, pa nan por wordo cuida manera debe ser. E doño ta biba na e cas unda a haya e cacho.
E doño lo haya un boet, cu nan ta laga e cachonan aki asina den un mal estado. E boet cu nan ta ricibi nan lo siña nan les, pa asina nan no sigui maltrata bestianan.
Por utlimo Sr. Rosel a haci un suplica na tur hende cu tin cachonan den un estado asina, cu tin un ley cu a pasa. Tin un articulo cu a wordo lanta pa proteha e bestianan aki. Si detecta/encontra un caso di maltrato animal, e doño lo haya un boet. Cuerpo Policial lo wordo yama pa casonan asina. Cualke hende cu wak un casi asina, yama Bureau City Inspector libremente, na 582-9777 of subi ariba www.infraruba.com y laga e mensahe atras.