Cacho cu ta cana riba caya, a causa un accidente awe mainta na Paradera. Dos persona a resulta herida.
Den careda di 7.30 di mainta a pidi presencia di polis y ambulance na Nuñe, Paradera, pa un accidente cu herido. Na yegada di e polisnan a topa cu un señora y un mucha sinta na suela riba caminda. For di e adulto, wela, por a compronde cu e tabata hibando su nieta scol ora cu un cacho a subi caminda y a bini direccion di e scooter.
Pa desvia di e animal, e wela a perde control y nan a cay cu e scooter. Por a nota cu nan a ricibi diferente rasca na nan curpa.
Paramedico a atende cu ambos na e sitio y nan situacion no tabata di gravedad. No ta conoci kende ta doño di e cacho pa para responsabel pa e daño causa na e scooter.