Recientemente cabesantenan di diferente Centro di Mucha a participa na e workshop, “Ora desaroyo cana otro of no bon, E solucion?” Como cabesante ta importante pa tin conocemento di e señalnan cu e comportacion di muchanan ta duna y e miho manera pa soluciona esaki. E cabesante ta e persona cu ta finalmente responsabel pa tur loke ta sosode den su centro, p’esey ta necesario pa e tin e “helicopter view” pa tur aspecto cu ta regarda desaroyo di e muchanan. Pa e motibo aki, Fundacion Pa Nos Muchanan (FPNM) a ofrece e workshop specificamente na e cabesantenan. E siman anterior a ofrece e topico aki na e lidernan (leidsters) di e Centronan, mirando cu e lider ta traha directamente cu e muchanan den grupo. Ta importante pa lider como cabesante tin e mes un informacion pa asina ambos ta para riba e mes un liña. Trabou cu mucha ta dushi, pero e por tin su retonan. Pa e motibo aki, nos ta gradici e cabesantenan cu a tuma e oportunidad pa participa na e workshop y alabes nos ta invita e cabesantenan cu no a haya chens e biaha aki, pa participa na e ripiticion di workshop “Ora desaroyo di mucha ta cana otro of no bon”, cual lo wordo ofreci na 2018. FPNM ta gradici drs. Swinda Dumfries, Orthopedagoog di Jeugdgezondheidszorg cu a fungi como orador durante e workshop den cual el a comparti diferente informacion y “tools” cual nan por usa den nan trabou diario cu mucha.
FPNM ta sumamente satisfecho con e workshop a bay y ta gradici Sra. Dumfries pa su tremendo presentacion. Cabesantenan di Centronan cu a participa ta: Centro di Cuido Moises, De Pareltjes kinderdagverblijf; Debbie Doo Speelschool, Dora y Diego Speelschool, E Barco di Noah Speelschool, Smart Kidz Playschool, My Little Zoo Daycare; Mannan Precioso, Pasa Dushi Pasa Pret Peuterschool; Pasadia Infantil Te aworo; Pica Piedra speelschool; Smile ‘n Shine peuterschool; The creative learning center; Walt Disney Speelschool; Laugh Play and Dream Daycare y Yupi Yupi Yah Kinderopvang. FPNM ta felicita tur cabesante cu a participa. Pa mas informacion tocante nos cursonan por tuma contacto cu nos na 588-0586/583-4247 of bishita nos Facebook page.