Pius X tabata tin diaranson ultimo un actividad en conexion cu dia di curazon. Aruba Heart Foundation a acerca e scol como un tryout pa un actividad. Esaki a bay hopi bon. E aña aki a hink’e den man di Ibisa y hunto cu nan, Ibisa a acerca algun scol, entre otro Pius X tambe. A invita e scol bisiña Fatima, pa asina haci algo grandi pa e muchanan. E accento tabata riba bula cabuya, cual nan a haya regalo. A haci diferente actividad cu tabata encera bulamento di cabuya. A pone enfasis riba cuido di curason. E muchanan ta trece dilanti cu por ta movecion, e por ta comemento tambe, pero e por tambe con bo ta cuida otro, con bo ta stima otro, con bo ta respeta otro. Tur eseynan tin di haber con bo ta cuida bo curason.
A informa nan e dia prome. Nan a bin e dia ey tur hunto cu un T-shirt Blanco. Hopi di nan a dorna algo di curason riba dje na cas mes, algun na scol. E ora a cuminsa cu un dia di movecion cu full scol. Tin cu bisa cu mayoria biaha ta haci esaki cu e muchanan, dus nan ta custuma cu tipo di movecionnan aki den grupo grandi. Despues a bay over na diferente stacion cu tabata tin y cada klas mester a haci un actividad y cierto momento nan ta cambia. E muchanan tabata hopi entusiasma. Algun klas a stel voor pa nan trece fruta scol, pa ora di comemento. E ora e enfasis tabata riba come saludabel. Despues nan tabata skirbi mensahenan riba curason cu nan tabata parti rond pa docente, of pa alumnonan, unda nan kier expresa algo pa nan.
Pius X tin docente di movecion y salud, unda cu e ta pone hopi enfasis riba e parti di movecion, pero tambe lesnan den klas cu ta bay tocante bo mes, bo cuido di bo persona completo. No ta solamente come saludabel, pero simplemente bo persona como e totalidad. E ta dun’e tambe na Fatima. Tin muchanan cu ta wak cu ta un tiki sobrepeso. Tin un atardi di gym cu e docentenan aki mes ta duna na muchanan. Ta invita e muchanan aki gratis pa participa tambe na esaki, pa asina haci algo na nan mes pa loke ta movecion, segun Lazo-Tromp