Cabes duro: Awo mas cu nunca gobierno actual mester pone orden den e desorden

0
RBC Juli 2018
Funmiles-2018

Poco despues di e derota electoral di AVP na 2001, Plataforma Accion Aruba Dushi Tera, un organisacion capa di entidad no-gubernamental, a entrega un proposicion na Parlamento nobo pa instala un comision. Esaki mester a investiga posibel acto coruptivo di e gobierno anterior di manera independiente. Na januari 2002, esaki a conduci na un mocion den cual a pidi gobierno pa instala un comision di berdad. Su tarea tawata pa investiga algun proyecto di gobierno cu a ehecuta durante e gobernacion anterior. Pasobra den comunidad tawatin bastante duda tocante integridad den esakinan. Motibo di tur esaki tawata e manifestacionnan grandi cu a tuma luga durante e añanan anterior, entre otro contra e proyecto di Racetrack. A culpa e gobierno concerni di mal gobernacion. Ademas, entre otro Controlaria General a publica documento cu a indica cu tawata falta transparencia den tuma decision y ehecucion di algun proyecto.
Encuesta parlamentario
P’esey tambe a pidi varios biaha pa institui encuesta parlamentario, entre otro pa trece claridad en cuanto e proyecto di Radisson Hotel. For di comunidad tambe a sali peticion den e direccion ey. Dia 5 di juni 2001, Aruba Trade & Industry Association (ATIA) a suplica Parlamento den un carta habri pa hiba un encuesta parlamentario tocante maneho di personal di parti di e gobierno en cuestion. Casi un aña despues, ATIA a haci otro peticion pa encuesta parlamentario tocante e siguiente casonan: Beta Hotel, Plantation Bay, Eagle Beach Hotel, e caso Fuentes, Trias Resort y e proyecto di Racetrack. Sindicato SEPA a sugeri pa hiba un encuesta parlamentario tocante e caso di Bushiri.

Como cu a propone un cantidad grandi di caso pa investiga mientras cu un encuesta parlamentario ta designa pa un caso specifico, a bira necesario pa duna Parlamento conseho al respecto. Esey tawata un di e tareanan di Comision di Berdad (CdB) cu a keda instala. E tension principal di CdB tawata integridad di gobierno y combatimento di criminalidad. Esaki tawata di gran importancia como cu na hopi pais corupcion ta mara na crimen organisa, locual ta hopi dañino pa democracia. Di ningun manera esaki tawata algo di fantasia, manera a resalta for di e rapport Koerten di parti di Servicio di Siguridad di Aruba. Segun nos Servicio di Siguridad, tawatin laso estrecho entre criminal di droga y gobernante.

Modus operandi
CdB a investiga un gran cantidad di proyecto, entre nan garantia di hotel, e problematica di Interbank cu CSS y FCCA, e asunto di ‘lucht- en zeebrieven’, Air Aruba, e proyecto di radar, expansion di haf y aeropuerto, Setar, e proyectonan di ATES y Bushiri Hotel, racetrack, parke di avestruz y ‘dividend-special’. Pero a duna e Plan Desaroyo Nobo San Nicolas (PDNSN) e tension principal.

Cooperacion di e director di Servicio Central di Accountant di e tempo ey y secretario di Conseho Consultativo a determina grandemente calidad di e rapport. E modus operandi dudoso di gobernante den colaboracion cu nan ‘partnernan di negoshi’ a resulta claramente for di e rapport aki. Specialmente e investigacion di PDNSN a demostra esaki (mira: http://deugdelijkbestuuraruba.org/wp-content/uploads/2016/10/Een-kwestie-van-mentaliteit-Comishon-di-Berdad-Groot-1.pdf). Al fin y al cabo e rapport a conduci na denuncia di parti di CdB contra 8 persona, incluso un ministro. A sentencia tur pa motibo di corupcion. Manera tawata di spera, segun e partido concerni tawata trata di persecucion politico.

Historia ta ripiti
Recientemente Controlaria General a publica e rapport Bo Aruba. E conclusionnan principal tawata cu di ningun manera no tawatin un plan di structura integral locual a trece riesgo cu cos por sali for di man. Ademas e falta grandi di informacion ta haci cu hopi proyecto ta incontrolabel. Di mes esaki ta hiba na e riesgo cu no ta uza e medionan na un manera drechi y/of efectivo. Consecuentemente e riesgo ta grandi cu e forma di procede cu a hiba lo tin consecuencia financiero negativo grandi pa Aruba. Esey ta pa motibo di e gran cantidad di placa envolvi. Mientrastanto a gasta Afl. 1 biyon di e Afl. 1,6 biyon cu a proyecta. Compara cu esaki, e casi Afl. 50 miyon cu tawata envolvi den e PDNSN tawata simplemente peanuts (5%).

Aunke e rapport di ARA tocante Bo Aruba, den comparacion cu su rapport tocante PDNSN, ta hopi limita y superficial, ta parce cu tin varios similaridad entre e forma di procede den tempo di PDNSN. Esey ta asombroso. En bista di e casonan legal cu basta consecuencia emocional pa esunnan envolvi, lo a spera cu lo a siña algo y cu lo a procede cu hopi mas cuidou. Ta parce cu nada di esey a tuma luga. Al contrario! Pasobra e partido concerni ta duna e impresion fuerte di a actua na un manera dudoso dor di a aparentemente kita un gran cantidad di documentacion digital y ‘duro’ tocante tur tipo di proyecto di e ultimo añanan for di conocemento di e gabinete actual. Di e forma aki posiblemente el a hinca su mes den otro aventura penal. Pasobra for di e veredicto ‘Computergegevens FCCA NJ 1997/574’ ta resulta cu kitamento di cargado di informacion cu ta pertenece parcial- of completamente na un otro (den e caso aki FCCA, of den caso hipotetico, di gobierno), por resulta den persecucion penal. E veredicto aki mester ta conoci cerca gobernante di e gabinete anterior.

Les
Pa e gobierno actual esaki ta nifica cu mas cu nunca e mester pone orden den e desorden y cu e mester sigui e criterionan di bon gobernacion y e stipulacionnan di ley di Compatibilidad (cu por cierto mester actualisa) na pie de la letra y de su espirito. Specialmente tumando na cuenta cu varios di su propio ministernan tawata directamente responsabel y/of envolvi den mayoria di e proyectonan menciona/investiga. P’esey tambe e mester hunga carta habri y mester completa eventual investigacion cu mehoracion concreto. Sigui pospone esaki ta nifica cu ta sigui mantene un ambiente fertil pa gobernante sigui comporta na un manera criminal.

Comments

comments

C: Heineken
new india