CARACAS, Venezuela – E diputado oficialista Venezolano, Diosdado Cabello, ex presidente di e Asamblea Nacional (AN), a evalua e posibilidad di scirbi un carta pa e presidente electo di Merca, e Republicano Donald Trump, pa pidi’e pa deporta algun Venezolano solicita pa husticia di e pais.
Durante su programa semanal di television, Cabello a referi na e plan di Trump, eligi siman pasa, di deporta cerca di tres miyon di imigrante cu, segun calculonan di e Republicano, ta esnan cu tin “antecedentenan penal.”
“Bueno, mi ta kere cu e carta ey mester wordo traha, nos ta bay bisa e meneer ey pa manda bek pa nos tur e ladronnan cu a horta tur e placa for di e Venezolanonan (…) pa e mandanan aki cu placa y tur cos,” Cabello a bisa.
E diputado a indica cu e solicitud aki ta inclui nomber di personanan “cu ta bisa cu na ta Chavista,” un idea cu ya el a asumi dianan prome, den alusion na dos ex funcionario di e Gobierno Venezolano: Rafael Isea y Hebert Garcia Plaza, ambos protegi pa e Gobierno Mericano.
“Pasobra Merca ta proteha Venezolanonan cu ta bay pa eynan y nan ta bisa coy loco,” Cabello a agrega den un suerte di critica na Garcia Plaza y Isea, kendenan a declara na Merca en contra di e Gobierno di e presidente Nicolas Maduro.
E Oficialista tambe a bisa cu e lo pidi Trump e deportacion di e ex bankeronan Eligio Cedeño y Nelson Mezerhane, señala pa husticia Venezolano di diferente iregularidad y acusa pa Chavismo di financia plannan subversivo contra Maduro y su Gobierno.
Por ultimo, Cabello a sigura cu Trump a sufri atake di parti di medionan di comunicacion similar na esunnan cu Chavismo, segun el a bisa, ta bin ta sufriendo diariamente desde 18 aña pasa.
Fuente: NTN24