MADRID (AP) — Ekiponan di rescate diamars a coba un tunnel horizontal den e zona montañoso di Spaña pa purba na yega na fondo di un pos smal y profundo, cu e speransa di haya un mucha di dos aña cu a disparce dos dia pasa.
E pos, di 100 m (330 ft) di profundidad y cu ta demasiado smal pa un adulto por drenta, a wordo habri luna pasa durante trabaonan di exploracion di awa y cual no a wordo debidamente señala.
E tunnel nobo aki lo yuda rescatistanan despues di cu nan no a logra di saca tera for di e pos cu makinaria pisa durante oranan di anochi, segun Maria Gamez, subdelegado di gobierno den e provincia di Malaga.
Un piedra grandi a stroba e makinaria di baha despues di 80 m di profundidad, el a agrega.
E mucha a disparce diadomingo durante un reunion familiar den un zona montañoso noordoost di e capital provincial.
Segun ekiponan di rescate, e mucha a cay den e pos diadomingo atardi ora cu el a aleha di su mayornan mientras cu e tabata hungando den e zona montañoso cerca di e pueblo di Totalan, noordoost di e ciudad di Malaga.
E pos ta demasiado smal pa un adulto por drenta, a wordo habri un luna prome pa trabaonan di inspeccion di awa y no a wordo tapa bek, segun medionan local ta informa.
Cu yudansa di un camara robot, bomberonan a haya e saco di mangel cu e mucha tabata tin cun’e, ora cu el a disparce diadomingo atardi.
Vocero di Guardia Civil, Bernardo Molto a wordo puntra di ta considera tambe otro motibonan pa e desaparicion di e mucha, Molto a bisa na prensa cu e prioridad di e autoridadnan tabata e “buskeda, localisacion y rescate di e mucha”.