GELDROP, Hulanda- E rector Leenderd van der Deijl di Strabrecht College na Geldrop no tin idea ainda si e alumnonan y nan acompañante tabata tin nan faha di siguridad bisti diahuebs mainta ora cu nan bus a dal den un truck.
Segun Van der Deijl ta un regla standard cu e chauffeur di bus, prome cu e schoolreisje cuminsa, ta bisa su pasaheronan pa nan bisti nan faha di siguridad. E ta asumi cu esaki a sosode asina tambe.
Tocante e seriedad di e heridanan di e pasaheronan e rector no por a bisa mucho cos. No tin niun pasahero cu su bida ta den peliger, pero si tin varios di nan ta seriamente heridad. Esunnan dilanti den e bus ta esunnan mas grave.
E scol a manda un team medico pa Francia pa atende cu e muchanan di scol involucra den e accidente di bus. Tambe tin un bus na caminda pa busca e muchanan y trece nan bek Hulanda. Un gran cantidad di mayornan a bay ariba nan mes pa busca nan yiunan na Francia.
Scol a pidi pa cooperacion di Slachtofferhulp. E cuido pa e victimanan lo por dura algun temp, segun e rector Van der Deijl. “ E efecto di un accidente asina por dura simannan, pero tambe por dura algun luna”.
E chauffeur di e bus a resulta gravemente herida den e accidente. Banda di e chauffeur, 11 alumno y 5 acompañante mester a wordo interna den e hospital di Duinkerk. E alumnonan di derde klas di VMBO tabata na caminda pa London pa un excursion.