MILAN, Italia- E sospechoso a afirma cu e tabata kier a comete suicidio y “stop e mortonan den Mediteraneo”. Polis a logra blokia e vehiculo despues di cu un di e hobennan a yama su mayornan.
Polis Italiano a detene un homber di 47 aña, acusa di secuestra un bus escolar y pa despues cende un candela den e interior di e vehiculo, medionan local a informa.
E sospechoso a secuestra e bus den cual tabata tin 51 alumno di un scol secundario na
Vailati di Crema, den e provincia Italiano Cremona, afirmando cu e tabata kier a mata su mes y “stop e mortonan den Meditaraneo”.
El a wordo identifica como Ousseynou Sy, un individuo cu antecedentenan penal originario di Senegal y ciudadano Italiano desde 2004.
E tabata e chauffeur di e bus y e mester a hiba e muchanan scol bek despues di un actividad deportivo. Na dado momento, el a cambia di rumbo y a dirigi su mes na e studiantenan cu cuchiu den man: “Niun hende ta sali na bida awe for di akiden”. Banda di dje tabata tin dos bleki yena cu gasolin, den un saco preto.
Un di e studiantenan a yama su mayornan, cu na nan turno a yama autoridadnan. Desde eynan, polisnan a cuminsa cu’n persecucion di e vehiculo. Huyendo di polis, e chauffeur a dal contra di varios auto, pero el a perde control over di e auto, pa cual e bus su velocidad a cuminsa baha te ora cu agentenan a logra blokia e bus.
E momento ey, Sy a basha gasolin den e interior di e vehiculo y e cende na candela cu’n lighter. E polisnan a kibra e bentana patras y studiante y maestronan a cuminsa sali, pero e chauffeur a blokia e salida di dos menor cu tabata hunto cu e maestronan. Finalmente, polis a logra desarma e chauffeur y detene.
Diesdos mucha y dos adulto a wordo traslada pa hospital pa a inhala huma.