E Bus di Salud a facilita e persona pa haci algun test cerca di su cas of cerca di su trabao. Dr. Luis Arrango ta splica ariba e desaroyonan di Bus di Salud.
E Bus di Salud a permiti pa crea e modelo di prevencion cu por uza y adopta na Aruba, cu eficiencia y eficacia real, y a duna un resultado positivo, segun Dr. Luis Arrango. E comunidad Arubano a compronde perfectamente kico ta e uzo di e servicio di prevencion. E modelo teoretico y practico ya caba ta funciona y awo ta e momento preciso pa expande e modelo aki. E cuido medico mester wordo acerca mas na e ciudadano. Acerca mas e cuido medico y specialmente e modelo di prevencion.
Ora di haci un checkeo na cualke dokter, despues di un siman ta haya resultado. Mientras cu na e Bus di Salud si ta logra, cu ta check y haya resultado mesun dia. E unidadnan di prevencion cu Dr. Arrango kier cuminsa cun’e den e plan nacional di prevencion, ta funciona mescos cu e Bus di Salud, pero na forma fiho, cu miho ekipo y amplia cu profesionalnan medico. Esaki ta pa duna asistencia na e momento ey, e orientacion preciso. No mester warda ariba resultado, e resultado ta keda cla mesora. Y esaki no por wordo aplica den consultorionan di dokter di cas, ya cu e modelo di atencion den e parti di e dokternan di cas ta full un otro sistema, cu nos sa cu e ta traha, e ta funciona. Pero ariba otro principio y otro modelo.
E desaroyonan tecnologico nobo por wordo incorpora mas cu claro. Tur hende na Aruba tin un smartphone cu por haci’e mas facil. Uza tecnologianan mas eficiente, cu ta mas barata y por reduci gastonan. E problema basico di enfermedadnan cronico, ta cu e pashent no tin un sintoma cla di e malesa. Pero e proceso ta desaroyando. Mas menos e inicio di e factornan di risico y e malesa ta transcuri entre 5 pa 10 aña. Esaki ta un bentana di oportunidad pa por aplica e modelo di prevencion. E pashent ta cuminsa cu e problema di presion halto y den 5 aña tin un candidato pa atake di curason. Den e 5 aña ey, factornan di comportacion, liga cu e comportamento por wordo modifica.
Pero e modernisacion y adaptacion di recursonan disponibel na mundo ta un bentaha enorme pa e pashent, segun Dr. Luis Arrango.