Instituto Biba Saludabel y Activo, IBiSA ta informa cu Bus di Salud ta riba caminda pa duna su servicio na comunidad. Diaranson dia 7 di november e Bus di Salud lo ta para na MFA Paradera y diahuebs dia 8 di november e Bus di Salud ta banda di luznan di trafico na Noord dilanti di Warda di Polis na Noord.
E orario di servicio di Bus di Salud pa publico ta for di 8:30 di mainta pa 3’or di atardi, pa cual IBiSA ta invita pueblo di Aruba en general pa acudi na Bus di Salud pa haci un chekeo di nan salud. E chekeo ta encera control di sucu, colesterol, presion y peso. Tur chekeo ta completamente GRATIS y no mester ta na yuna. Unico rekisito ta e carchi di AZV (valido).
IBiSA ta sigui traha pa conscientisa e pueblo di Aruba riba e importancia y cuido di nos salud, alabes ta promove pa cada ciudadano hiba un estilo di bida mas saludabel, pa keda activo y haci movecion. Probecha di e oportunidad y acudi trempan pa por haya e servicio.
Pa mas informacion di e programa por yama IBiSA libremente na 5824987 of manda un email pa [email protected]. Tambe por bishita e Fb page di IBiSA Aruba pa mas informacion.