Luna di October ta ‘Luna di Salud’ na Barcelo Aruba Hotel, anteriormente conoci como Occidental Grand Aruba Hotel. Gerencia di e hotel ta considera salud di su empleadonan hopi importante, como tal no a duda pa inclui Bus di Salud na un di e actividadnan cu a tuma lugar.
For di sra. Jane Braafhart cu ta Directora di Recurso Humano di e hotel, a haya un splicacion di e actividad cu a prepara pa luna di october. Esaki a haya e lema di ‘Salud pa e trahado’. E bishita di Bus di Salud di IBiSA a marca inicio na e luna di salud. No ta prome biaha cu e Bus di Salud ta na e hotel. Precisamente door di nan experiencia anterior y e bon resultadonan, Gerencia di e hotel a dicidi pa un biaha mas facilita e trahadornan cu e servicio di Bus di Salud.
Durante henter e luna di October, Barcelo Aruba Hotel lo tin diferente actividad di salud pa su empleadonan. Entre otro nan lo haya lectura, chekeo di bista, lo haci promocion pa comemento saludabel, ta bay tin competencia pa baha peso y hopi mas. E hotel tin su meta y kier logra pa su trahadornan ta saludabel y tin e gana y animo pa bin trabao tur dia. Como tal ta organisa e ‘Luna di Salud’ y ta duna tur atencion na e necesidadnan di su trahadonan.
Barcelo Aruba Hotel ta considera cu nan tin dos tipo di huesped. E prome ta esun cu ta paga pa su estadia na e hotel y e otro ta nan propio empleadonan. Gerencia su deseo ta, pa e empleadonan wordo trata mes bon cu ta trata e huespednan turista. Hasta den preparacion di cuminda, esaki ta special pa motibo cu ta stimula e empleadonan pa come saludabel. Na final di luna di october, e hotel ta preparando pa organisa un encuentro cu tur trahador, den forma di un caminata of otro tipo di movecion pa nan salud. Durante e actividad aki lo anuncia e empleado ganador cu a logra baha mas peso.
Gerencia di Barcelo Aruba Hotel y su empleadonan a keda contento y satisfecho cu e servicio di Bus di Salud, pa cual ta gradici IBiSA un biaha mas pa contribui na promove salud na dicho hotel.