Bus di Salud di IBiSA ta cla pa sali y duna servicio

Despues di un temporada di mantencion, tur preparacion a wordo haci pa Bus di Salud sali bek riba caminda pa brinda servicio na comunidad. E espectativanan ta grandi pa cera aña 2016 logrando e meta stipula di duna asistencia y conseho na 20.000 cliente riba tereno di promocion di salud desde comienso di september 2012.
Team di Bus di Salud di IBiSA ta contento di por reanuda su servicionan na publico. Pa e di dos mita di aña 2016 tin diferente actividad planea pa e comunidad di Aruba. Luna di september 2016 lo enfoca riba e salud di e curason, en conexion cu ‘Dia Mundial di Salud’ dia 29 di September proximo. Den luna di October 2016 e enfoke ta riba salud di nos grandinan, en conexion cu ‘Dia Internacional di nos Grandinan’ cu ta dia 1 di October. November ta luna di Diabetes y lo enfoca riba e prevencion di diabetes. IBiSA lo mantene comunidad informa di nos actividadnan.
Departamento di administracion di Bus di Salud ta informa na tur compania, organisacion, club, scol of otro instancia cu ta desea di haci uzo di e servicionan di Bus di Salud pa 2017, cu por cuminsa manda nan peticion aden pa esaki por wordo registra y programa.
Pa haci esaki of pa mas informacion por tuma contacto cu sra. Charlene Bergrok Geerman na oficina principal di IBiSA situa na Frankrijkstraat 1, of por yama na telefoon 582 4987. Por
tuma contacto tambe via email: [email protected] .

Comments

comments