E Organisacion Mundial di Salud oficialmente a identifica burn-out como un malesa. E miembro nan di OMS durante e encuentro anual na Geneva a agrega burn-out como tambe gambling na e catalogo cu mas di 55 mil malesa, sintoma y motibonan di malesa.
E organisacion ta considera burn-out como un sindrome, “ocasiona door di stress cronico na pia di trabou”. Un burn-out, den e definicion di WHO, ta causa cansancio, un postura negativo pa cu e trabou y un rendimento abou.
Na 2007 11% di e trahadonan na Hulanda a bisa di ta sufri di burn-out. Den 10 aña di tempo esaki a subi te cu 16%.
Codigo unico
E catalogo di OMS a wordo revisa y adapta despues di 30 aña y lo drenta na vigor entrante 1 januari 2022.
Pa cada condicion den e catalogo tin un codigo unico asigna. Burn-out a haya e codigo QD85. Den un futuro, dokternan lo registra nan diagnosis cu e codigo aki. Asina por mantene estadisticanan y documenta tendencianan di salud.
Ademas di burn -out y gambling a agrega condicionnan manera conducta sexual forsoso y online gambling tambe na e lista di OMS.
