Recientemente nos por a observa den medianan di comunicacion, cu a surgi un preocupacion grandi relaciona cu un caso di 3 mucha cu actualmente ta biba cu nan mama y su pareha nobo.
Den e ultimo dos dianan e famia aki a wordo bishita door di ambos Polis y Directie Voogdijraad. E caso aki actualmente ta bou di investigacion cerca Bureau Sostenemi pa asina por determina e situacion cu e muchanan aki ta bibando aden. Instancianan tin hopi contacto cu tur miembronan di famia, incluyendo e wela di e muchanan y e scol caminda nan ta bay. E caso aki ta uno complica y ainda tin hopi pregunta cu sigur mester haya su debido atencion y wordo contesta, pa por haya un bista concreto relaciona cu e situacion di e muchanan aki pa por brinda nan un miho futuro. Pa por haya contesta riba tur e preguntanan aki mester haci un investigacion profundo primordialmente y esaki ta locual cu ta tumando luga.
Awe a tuma luga un reunion conhuntamente cu Polis, Bureau Slachtofferhulp, Departamento di Asunto Social y Bureau Sostenemi. Durante e reunion aki tur instancia a wordo bon informa di e caso y a haci palabracionnan concerni e siguiente pasonan cu mester wordo tuma luga pa cu e investigacion aki. E preocupacion cu a surgi den e ultimo dianan por causa mas daño na e famia y muy en especialmente e muchanan, door di e atencion negativo cu e ta ricibiendo. E mas primordial pa e caso aki por cana su caminda debido ta pa instancianan cumpli cu e palabracionnan cu a wordo haci.
Nos di Bureau Sostenemi ta compronde e preocupacion aki pa cu e muchanan. Pa es motibo nos ta informa cu nos lo ta acercando tur personanan concerni cu ta preocupa y cu a bin pa dilanti cu informacion di caso aki den forma publico, pa asina informanan debidamente y corectamente di ful e investigacion.
Tur e profesionalnan envolvi den e caso aki ta trahando incansabelmente pa percura cu e muchanan aki ta sigur y ta haciendo tur lo posibel pa e caso aki wordo resolvi debidamente. Nos ta pidi comprencion di parti di pueblo pa asina e caso aki por cana su caminda. Na prome luga ta e seguridad di e muchanan aki, y pa esaki ta tragando ariba un plan di seguridad (veilighedsplan) pa e caso.
Directie Voogdijraad
Korps Politie Aruba
Bureau Slachtofferhulp
Departamento di Asuntonan Social
Bureau Sostenemi
