Diadomingo ultimo, dia 7 di oktober 2018 e departamento di gobierno Bureau Interne Diensten “BID” ta cumpli 65 aña di existencia. departamento cu ta conoci como e celebro di gobierno a wordo lanta 7 di oktober 1953 bou di e nomber di Registratuur en Archief. Na aña 1986 cu ampliacion di su tareanan y departamentonan e nomber a wordo cambia pa Bureau Interne Diensten. E tarea principal di BID ta registra, controla e desaroyo, hiba trece y archiva tur documento cu ta bin pa y for di e ministronan.
BID ta e instancia oficial di gobierno cu ta registra tur nan documentonan. E tempo prome te na aña 1991 tur e trabounan tabata wordo haci manual. Desde 1991 a cuminsa automatisa y te ainda ta bezig haciendo esaki pa mehora e servicio tanto pa gobierno completo como pa nos pueblo pa ta mas eficiente y eficaz. Otro tareanan di BID ta duna yudansa ariba tereno tecnico funcional tambe ariba tereno di registracion y archivo, hiba y trece documentonan, abastece cu material di oficina y limpiesa y tambe saca copia, tur esaki ta pa casi ful gobierno, semi —gobierno, parlamento y scolnan.
E trahadonan di BID semper a haci nan best pa haci nan trabounan lo miho posibel apesar di hopi biaha tabata traha den situacionan hopi dificil. Nan mester traha cu tur e gobiernonan cu bin na mando y hopi biaha pa e trabounan cu -nan ta haci cu ta exigi hopi responsabilidad y integridad, hopi biaha nan ta e promenan cu ta wordo señala y acusa.
Pero haciendo nan trabou cu profesionalismo, amor, respet y responsabilidad den union como famia semper nan a logra cu awor BID por a cumpli 65 aña di existencia y spera cu poder di Dios cumpli hopi aña mas.
Palabra di pabien na tur e hefenan y trahadonan cu t’ey y esunnan cu no tey mas cu ta y a traha na BID pa e bon servicio cu semper nan a duna na tur e gobiernonan, departamentonan, etc. y na nos pueblo en particular.