Bureau City Inspector a topa hala di sushi na Madiki

For di inicio di aña Bureau city Inspector (BCI) a cuminsa manda inspectornan den diferente bario pa controla y registra caso di sushinan tira den mondi. Un di e areanan unda nan ta trahando awo ta na Madiki unda a topa cu sushi tira recientemente.
Robby Rosel, funcionario di Bureau City Inspector, a splica cu na Madiki a topa hopi sushi, probablemente resto di construccion cu en bes di hiba nan dump, a laga nan tira den e bario mes. Cada tiki cu e hendenan trece, ta haci cu e sushi ta bira hopi. Ta papia di sushi di rosamento pero tambe boternan di cerbes. Sushi ta yama bestia y e ta un mahos bista pa Aruba.

Rosel a boisa cu ta increibel e cantidad di sushi cu ta topa rond, cuminsando for di Vader Piet, unda a topa corchon bieu, wcnan bieu, resto di vehiculonan. Y e no ta solamente Vader Piet, pasobra practicamente den tur bario ta topa sushi y esun di mas hopi ta na Dakota.
El a haci apelacion na DOW y DIP pa ora cu ta duna permiso, exigi cu nan ta pone un container grandi pa tira e resto di sushi di consruccion.
Den caso di Madiki, a cuminsa averigua kende ta doño di tereno pa responsabilisa su mes pa e situacion. Aworaki SERLIMAR ta bezig cu e trabou. Tur hende por a bay tira nan sushi na dump y e unico cos cu nan mester haci ta registra ki tipo di sushi nan ta hiba y no ta cobra nan. Comerciantenan facilmente por busca un bari na SERLIMAR pa tira e sushi di nan negoshi en bes cu ta laga esaki riba caya.

 

Comments

comments