Ayera tabata un dia hopi special pa Island Aquatics Aruba hunto cu 9 otro criador local di pisca Fighting Fish [Betta] y tambe cu ayudo di Sofie Slegers, El Mustachi te Ama y otro dos Petshop local cu a kere den e projecto Betta Donation pa muchanan di Imelda Hof y Casa Cuna.
Ayera durante Thanksgiving, e grupo a pasa cu un sorpresa pa e muchanan di Imelda Hof. Un di e criadornan, Andro Croes, ta bisa cu den grupo di amigo y criadornan di pisca a sera cabes pa duna e muchanan un fighting fish como donacion. E pisca ta simbolisa pisca guerero, un bringador. “Nos kier nos muchanan sinti nan mes comfortabel pa nan tin un amigo, un compañero cu nan, y alabes nos kier pa nan sinti como guerero pasobra nan tin cu lucha pa nan disciplina”, segun Andro Croes.
E idea a nace un par di luna atras a sinta pensa kico por haci cu tur e piscanan cu nan ta broei. A bini na un acuerdo pa haci un donacion, a bini hunto y selecta e piscanan anto bay haci e donacion aki pa e muchanan: ‘nos ta bay 100% pa nos muchanan y tanten nan tin un sonrisa riba nan cara nos ta contento’, Andro ta expresa. Nan a bini hunto cu e breeder mas jong den e hobby, Zayrick Croes di 5 aña di edad, cu 4 aña el a broei su prome Fighting Fish. E mucha a bini tambe pa inspira otronan na Imelda Hof y duna informacion riba e hobby, con ta cuida e pisca.
Natalia Hernandez, directora di Imelda Hof ta bisa cu pa e muchanan e ta algo hopi bunita pa tin un pisca pa cuida, y el a haya hopi mas bunita cu Andro a bini cu e grupo pa entrega e muchanan e pisca. “Mi ta pensa cu ta hopi importante no solamente e entrega pero tambe cu nan lo haya un splicacion kico e pisca ta, y con pa cuid’e. E ta bira un pisca pa cada mucha unda nan por siña tin responsabilidad pa cuida algo cu ta di nan mes y tambe siña algo di e pisca”, sra. Hernandez ta bisa.
Esaki ta un forma cu por yuda e muchanan pa trece trankilidad tambe cual ta algo nobo y diferente pa e muchanan,un idea hopi creativo y bunita cu a wordo realisa ayera durante Thanksgiving. Pronto lo tin un siguiente serie di donacion e biaha aki pa e muchanan di Casa Cuna.