Diamars atardi bou di un publico grandi for di exterior, e competencia 2da Fuerza Concecabol Aruba 2018 den e deporte di bowling a keda inaugura. Durante casi un siman largo, Eagle Bowling Palace ta e cas di un competencia internacional di bowling cu lo conoce un participacion di alrededor di 50 atleta femenino y masculino. E miho segundo bolicheronan femenino y masculino di e pais den nos continente y region manera Colombia, Costa Rica, Guatemala, Peru, Venezuela, Corsou y Puerto Rico a bini Aruba pa asina bataya den e campeonato di Concecabol. Na e ceremonia di apertura, presidente di ARBAS, Sra. Prisca Albertsz a yama tur presente bon bini y desea cada pais tur clase di exito den e torneo aki. Tambe a hiba palabra e presidente di Concecabol, Sr. Gustavo Lopez cu tabata tin palabra di elogio pa e deporte di bowling y sigur na nos bolicheronan. Su persona a remarca cu un bes mas e ta masha contento di por ta na Aruba pa un otro torneo internacional di nivel. Durante añanan cu a pasa, Aruba su atletanan di bowling a sa na presta y logra medaya importante den weganan grandi den nos region. Es mas Aruba simplemente a bira un pais renombra y respeta pa su bowling cu sin duda ta un di e deportenan mas exitoso den e ultimo añanan. Logronan den e ultimo añanan di entre otro Kamilah Dammers-Naddall, Thashaina Seraus, Elias Halabi, Jeadine Luidens y tur e otro bolicheronan a pone cu e deporte aki sin duda a bira un di esnan mas exitoso na Aruba.
E hoben bolichero y alabes ganador di e Macau Open 2017 na China, Elias Halabi a haci sake di e prome bala inaugurando asina den forma official e torneo internacional di bowling na Aruba. Mester bisa cu e delegacion di Aruba ta cla pa bataya den e campeonato aki. Un invitacion pa un y tur yega Eagle Bowling Palace
Stichting Sportsubsidie Aruba a subsidia e campeonato 2da Fuerza Concecabol Aruba 2018.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.