Buki nobo pa mucha Oro Ubao

Un buki nobo yen di storia di Aruba ta riba mercado. Pa su Festival di Buki pa Mucha, Biblioteca Nacional Aruba a traha riba produccion di un buki pa mucha. Esaki den cooperacion cu Levendig Uitgeverij na Hulanda. E produccion nobo titula ‘Oro Ubao’ ta un publicacion di diferente storia y poema historico pa mucha. E publicacion ta na 2 idioma, Papiamento y Hulandes. Contribucion ta di e escritornan di buki pa mucha Liliana Erasmus, Jeroen Hoogerwerf, Lizzy van Pelt y Robert Reeberg. Ilustracionnan ta di artista visual Elvis Tromp.
Na Hulandes e titulo ta ‘Schelpeneiland’. Biblioteca ta produci e buki pa tur mucha na Aruba, ta pesey ta percura pa e ta na 2 idioma. Asina por usa e buki na scol tambe. E buki ta bay pa tur scol particpante. Cu e apertura oficial di e Festival di buki pa mucha 2020 por haya e buki gratuitamente na tur libreria ora cumpra un buki pa mucha, tanten cu tin. Asina biblioteca ta percura pa mas mucha por haya e buki pa lesa. Naturalmente mucha por fia e buki tambe na biblioteca tambe. Tin storia pa mucha entre edad di 4 pa 12 aña.
Tur aña e festival tin un tema cu ta sirbi como inspiracion, e aña aki ‘Historia’ ta e guia pa lesamento. Muchanan por lesa 16 storia y poema di indian, historia di Paardenbaai, un storia di Maria Largo, un receta pa Keshi Yena, oro na Aruba, storia di Carnaval, Arte, kapel di Alto Vista y mucho mas. Ilustracion riba portada tambe ta di Elvis Tromp. Traduccion: Lilian Semeleer y Sophiene Maduro-Verhaegh
Sponsors di Festival di Buki pa Mucha 2020: Setar NV, Quota International of Aruba, De Wit & Van Dorp, Arugas NV, FCCA, Kiwanis Club of Palm Beach, Plaza Bookshop, PlusAccountants, Century Group, Guardian Group, Qredits, Deloitte, Aruba TV Canal 49.

Comments

comments