Diaranzon atardi a lansa e buki “Historia di FUTBOL DI ARUBA 1909-1959-E prome parti” scirbi pa e historiador Arubano Sr. Francisco “Fico” Vrolijk. Dilanti di famia, invitadonan di honor, patrosinadornan, colaboradonan y prensa a lansa e buki di futbol cu ta contene no menos cu 300 y pico pagina. A traha hopi largo riba e buki pero al fina a keda cla cune. Tur e personanan tras di e exito di e buki a hiba palabra e atardi aki. Tanto Sr. Gerald Franca di ASU, Sr. Richard Dijkhoff di AVB, Sr. Di-Stefano Wernet di St. Fundacion Lotto pa Deporte tabata tin palabra di elogio pa e autor Sr. Fico Vrolijk cu despues di hopi aña ta mira un berdadero soño bira un realidad. Un soño cu no tabata posibel sin ayudo di varios persona kendenan tambe a haya un buki regalo como muestra di aprecio. Sin nan contribucion cu principalmente cu imagennan inolvidabel no lo por a realisa e buki historico aki.
Sr. Fico Vrolijk den un forma hopi emocional a dedica e buki aki na su querida yiu muhe Suhail awe den felis memoria cu semper a yuda su tata den corta e relatonan di corant y warda esakinan. Casualmente e buki a wordo lansa mes un fecha cu su yiu muhe a fayece 6 aña pasa. Tambe na Sr. Mai Mateo un baluarte den nos futbol y un gran amigo personal di Fico.
Na final e hobencita Sheqayli Ascencion cu a caba di gana un premio internacional durante di e Mundial di futbol Russia den presencia di colaboradonan a haya e honor di basha e confeti riba e buki bautisando esaki den forma oficial. Despues Sr. Vrolijk a otorga algun persona kendenan a contribui grandemente cu e realisacion di buki. E personanan aki ta Ruben y Dito Mateo yiunan di Mai Mateo, Ruth Kelly, Sheila Werleman cu a yuda cu layout y drecha e potretnan. Tambe baluarte y un di e miho porteronan di tur tempo, Leon Ras, baluarte y ex hungador di seleccion Fenchi Dubero, Eddie Berg di Britannia y Michael Tromp. Tur e personanan aki a contribui grandemente cu e buki di futbol.
Desde awe adelante e buki “Historia di FUTBOL DI ARUBA 1909-1959-E prome parti” ta obtenibel den tur libereria of por tuma contacto tambe cu Sr. Francisco Vrolijk riba su pagina di social media.
Lotto cu cu
rason pa deporte ta cambiando bida di deporte “Rey” na Aruba dor di a aporta financieramente na e buki balioso aki na interes general di deporte na Aruba.