Bucuti & Tara Beach Resort ta e orguyoso anfitrion di e delegacion Aleman di ingenieronan, arkitectonan y otro expertonan di solucionnan sostenibel cu a bin Aruba pa presenta na e German Green Technology Conference 2021, Smart Buildings for Sustainable Caribbean Islands. Expertonan distingui a reuni Maart 24 pa discuti e posibilidadnan y potencial di reduccion di energia y e costonan di edificionan sostenibel.
“Nos ta honra cu e grupo prestigioso aki a escohe nos como hotel. Cada presentador ta representa un ehempel exitoso ei solucionnan sostenibel cu por wordo aplica na Aruba of internacionalmente,” Ewald Biemans, doño/CEO di Bucuti & Tara Beach Resort, ta splica. “Sostenibilidad no ta un opcion mas den nos estado actual di calentamento global y ta sumamente importante pa nos uza tur oportunidad pa siña con pa protea nos medio ambiente pa futuro generacion.”
Biemans, kende ta reconoci mundiamente como un di e pioneronan di sostenibilidad, tawata un presentador na e conferencia. E la comparti su experiencia den haci su hotel e prome, y te ainda unico, hotel certifica Carbon-Neutral den Caribe. Como visionario di e hotel mas eco-certifica di Caribe, Biemans a splica e beneficionan medioambiental cu ta proporciona tanto na nivel local como global.
E conferencia a enfoca riba perspectivanan tecnologico pa hotelnan, oficinanan, aeropuertonan y edificionan residencial. Participantenan por a tende e debatenan di e grupo di expertonan y tambe nan por a participa den sesionnan individual cu funcionarionan di gobierno, expertonan y companianan Aleman y Caribense.
Pa Bucuti & Tara su Sustainability and Environmental program: www.bucuti.com/resort/eco-friendly.